CEBU, Philippines – Mokabat sa P1.6 milyones ang katibuk-ang balor sa mga modernong libro alang sa mga tinun-an sa elementarya ug sekondarya sa Don Sergio Memorial National High School ug Tisa National High School ang gidonar ni Kongresista Antonio Cuenco didto sa Day Care Center sa barangay Labangon niadtong Sabado sa hapon.
Si Barangay Captain Felix Abella sa Labangon ingon man Barangay Captain Eduardo Cabulao sa Tisa ug ang Presidente ug General Manager Jovita de Jesus sa F & J De Jesus Inc. nga maoy supplier sa maong mga basahon ug Bise Mayor Michael Rama maoy nanambong atol sa pag-turn over ning maong mga libro ngadto sa mga magtutudlo sa nahisgutang tunghaan.
Makapahimulos usab ning maong mga basahon ang mga tinun-an sa elementarya sa Bless Elementary School sa Labangon ug Tisa Elementary School.
Si Kongresista Cuenco mibutyag sa Banat News nga ang gahin niini gikan sa iyang Countrywide Development Fund (CDF) isip kabahin sa iyang programa sa pagpalig-on sa pundasyon sa edukasyon sa mga tinun-an sama sa comprehensive reading nga pormal niyang gibuksan sa barangay Labangon unya ipakatap pa niya kini sa tanang eskuylahan sa south district.
Samtang si De Jesus miingon nga ang maong mga libro, 100 percent error free , o wala gyu’y sayop bisan gamay sa dihang gisukit siya sa kongresista kalabot sa kalidad sa maong mga libro.
Sila si Kapitan Abella ug Cabulao mihangop sa maong kalambuan kay alang kanila daku kini og ikatabang sa mga tinun-an sa ilang lugar. Lakip sa mitambong sa ceremonial turn over mao ang mga principal ug mga magtutudlo sa nahisgutang tunghaan sa elementarya ug sekondarya sa barangay Labangon ug Tisa. - Darrel A. Carumba (BANAT NEWS)