CEBU, Philippines – Nabulit sa samad ug pangos ang lawas sa usa ka lalaki dihang ang gisakyang motorsiklo niini nadasmagan og laing motorsiklo nga ‘hit and run’ didto sa Macapagal Highway corner Peñalosa Street sa Poblacion siyudad sa Toledo kagahapon sa ala 1:00 sa kaadlawon.
Ang biktima mao si Michael Garcia, 30, minyo , nga taga Purok-5, Talavera, siyudad sa Toledo , kinsa walay lisensya sa pagmaneho og sakyanang de motor.
Samtang ang nakadasmag kaniya wala hiilhi kay misibat dayon kini human sa hitabo apan ang motorsiklo niini kolor itom nga wala usab kakuhai og plate number sa biktima.
Si SPO3 Allan Barquin, traffic investigator sa Toledo City Police Station mibutyag sa Banat News nga ang biktima nagpaingon sa Poblacion gikan sa Talavera dihang pag-abot niini sa eskina sa Macapagal highway ug Peñalosa street, kalit lang siyang gidasmagan sa motorsiklong itom. – BANAT NEWS