Dengue mipatay og 14 ka tawo

CEBU, Philippines – Ang sakit nga dengue mipatay na og 14 ka tawo dinhi sa Central Visayas ug 9 niini gikan sa dakbayan sa Sugbu, sukad sa bulan sa Enero hangtod sa Mayo ning tuiga, matud pa ni Dr. Raymund Ogan ang Dengue Coordinator sa dakbayan sa Sugbo atol sa pakighinabi sa Banat News kagahapon.

Matud pa ni Dr. Ogan nga sukad pa sa milabay’ng tuig 2008, ang dakbayan sa Sugbu maoy may labing daghan og kaso sa dengue diin base sa ilang talaan miabot ngadto sa 589 ka kaso ug 25 ka mga kinabuhi ang nakalas sa maong sakit. Samtang sa awahing talaan sa Regional Epidemiology and Research Unit (RESU) nasayran nga gikan sa bulan sa Enero hangtod Mayo ning tuiga mikabat na sa 310 ang mga kaso niini ug mikalas na og 14 ka kinabuhi.

Nasuta usab nga ang barangay Camputhaw maoy nag-una sa labing daghan og kaso sa dengue, diin sa 28, usa niini ang namatay, gisundan kini sa Labangon nga adunay 21 ka kaso, ug 2 ang namatay, Lorega 16 ka kaso ug 2 ang patay, Guadalupe may 14 ka kaso ug usa ang patay, Mambaling 7 ka kaso ug usa ang patay, Binaliw usa ka kaso ug usa ang patay ug ang Sudlon II usa ka kaso ug usa ang namatay. - Bong Soriano (BANAT NEWS)