Tulisan nasikop sa mga tanod

CEBU, Philippines – Nasikop sa mga barangay tanod ang usa ka tulisan human tulisa niini ang usa ka babaye didto sa sitio Pakpakan, barangay Basak dakbayan sa Lapulapu sa milabay’ng gabii.

Ang suspetsado mao si Berto Gomez Sanoria, 28, ulitawo, nga taga Pakpakan, samtang ang biktima mao si Maricel Limpangog, 22, dalaga, nga taga sitio Suba –Masulog, sa nahisgutang barangay.

Si SPO4 Melchor Amit sa Lapulapu City Police Station mibutyag sa Banat News nga naglakaw sa maong dapit si Limpangog dihang kalit kining giduol ni Sanoria uban sa pagdeklarar nga tulis.

Gumikan sa kahadlok sa biktima, iyang nahatag ang iyang cellphone ug nataymingan usab nga may mga tanod nga nagpatrolya, busa gisuginlan dayon sa biktima sa nahitabo kaniya.

Sila si Roger Dalumpines ug Emilio Visande nga mga tanod sa Basak, nangita dayon sa suspetsado ug dihang nakit-an kini giposasan dayon ug gibalhog sa prisohan sa kapolisan ug gisakmit ang cellphone nga iya sa biktima.

Nagpahayahay na karon ang suspek sa prisohan samtang gipaabot ang kiha nga isang-at sa biktima batok kaniya. - Bong Soriano (BANAT NEWS)