CEBU, Philippines – Pormal nang nakalingkod isip bag-ong direktor sa Cebu Provincial Police Office si Sr. Supt. Jesus Gacquing sa duha ka seremonyas nga gihimo kagahapon, usa niini diha sa Police Regional Office-7 ug ang ikaduha diha sa buhatan ni Cebu Governor Gwendolyn Garcia.
Si CPPO acting director, Supt. Erson Digal mipasa sa maong responsibilidad ngadto kang Gacquing samtang ang kanhi buhatang gigunitan ni Gacquing nga mao ang Logistics sa PRO-7 gipasa niya ngadto ni Digal.
Si Garcia nagpasalamat ngadto kang Nerez tungod sa daling pagsanong sa iyang hangyo nga palingkoron na si Gacquing tungod sa kadako ug ka-importante sa tahas niini pagmentinar sa kahapsay ug kalinaw sa lalawigan.
Ang Sugbu giisip nga tourism hub sa Visayas ug gipanglantawang dako ang papel sa kahapsay ug kalinaw sa kalamboan niini.
Ang gobernadora nanghinaot nga mapadayon o ba kaha mapalabwan pa ni Gacquing ang mga accomplishments ni kanhi CPPO director Carmelo Valmoria.
Si Nerez sa iyang bahin mimando kang Gacquing nga disiplinahon ang mga badlongong sakop dungan sa pagpatuman sa mga programa sa PNP batok sa mga krimen.
Gihulagway ni Nerez nga ang disiplinadong mga polis maoy yawe sa kalampusan nga gitinguha sa PNP.
Sa iyang bahin, si Digal mapasalamaton sa hamubo niyang paghawid sa CPPO isip officer-in-charge ug ingon man sa pagkabutang kaniya sa usa sa mga dakong posisyon sa PRO-7 nga mao ang Logistics.
Sumala pa niya pinaagi niini hayan dako ang iyang purohang ma-promote sa sunod nga ranggo. - Rey Pasaporte ug Guam Logroño (BANAT NEWS)