CEBU, Philippines – Giabswelto sa kasong graft si Mayor Rogelio Bacquerfo sa Sandiganbayan nga gipasaka sa iyang kaatbang sa politika kabahin sa giingong municipal waterworks system nga iyang gibalhin og dumala ngadto sa barangay.
Si Justice Ma. Cristina Cortez Estrada sa Sandiganbayan fifth division mipakawalay sala kang Baquerfo sa kasong gipasaka ni Demetrio Granada nga kalapasan sa Section 3 (e) of the Republic Act 3019 kon Anti-Graft and Corrupt Practices Act pinaagi sa paghatag kang Bacquerfo og demurer to evidence.
Si Granada mipasaka og kaso kang Bacquerfo niadtong Abril 15, 2004 tungod sa pasangil nga walay resolusyon sa konseho sa lungsod ang pagbalhin sa pagdumala sa maong patubig ngadto sa barangay Puertobello ug uban pang mga punto nga ilang gituohang gihimo sa illegal nga paagi.
Sa gipagawas nga desisyon sa anti-graft court niadtong May 21, 2009, giingong wala mapamatud-i sa prosekusyon sa ilang mga dokumento ug testimonial evidence ang pasangil batok kang Bacquerfo.
“The court finds the prosecution’s documentary and testimonial evidence insufficient to establish the commission of the crime charged,” sumala pa sa desisyon sa korte.
Sumala pa sa korte napakyas ang prosekusyon pagmatuod nga gihimo ang pagbalhin sa pagdumala sa Puertobello Waterworks System ngadto na sa barangay officials sa illegal nga paagi.
Gani mibutyag ang korte nga tim-os ug matinud-anon hinuon ang gihimo ni Bacquerfo kini aron mas mapaabot gyud ngadto sa publiko ang serbisyo sa patubig.
“In deed, what has been apparent, instead, was the noble intention of accused “to hasten the delivery of water services,” sumala pa sa korte.
Sa tubag ni Bacquerfo sa maong pasangil human siya pasakai og kaso ni Granada kalabot niini kini mipadayag nga iya kining gihimo tungod usab sa reklamo sa mga residente nga gigamit ni Granada ang tubig aron piiton ang mga residente sa maong barangay gumikan kay kini kaalyado ni Bacquerfo.
Sa desisyon sa Sandiganbayan kini miingon nga wala sila makakita og timailhang may gipili o gipaboran si Bacquerfo sa pagbalhin sa maong water system gani diha gyud gitugyan niya sa barangay officials.
Ang abogado ni Bacquerfo nga si Atty. Noel Archival nagkanayon nga ang desisyon sa korte nagpakita lang nga walay nagpaluyong kahiwian sa pagbalhin pagdumala sa maong water system. - Edwin Ian Melecio ug Fred Languido (BANAT NEWS)