CEBU, Philippines – Nagtagbo ang mga sakop sa duha ka managribal nga gang sa barangay Carreta nga giingong maoy nagmugna og kagubot sa maong barangay ug misaad nga di na subling mohimo og kagubot.
Ang panagtagbo gitambungan sa kapolisan sa Waterfront Police Station, barangay kapitan Eduardo Lauron ug mga ginikanan sa mga miyembro sa Crips ug Bloods gangs.
Si Lauron miangkon nga dakong problema gyud sa ilang barangay ang maong mga gangs ug usa sa iyang gituuhang solusyon niini mao ang pagpahigayon og dialogue sa maong mga grupo.
Nasayran nga ang panagsuyaay ug initay lakip na selos sa mga uyab-uyab ang usa sa hinungdan sa ilang panagbingkil nga miresulta na sa pinusilay sa isig ka grupo.
Samtang sa laing bahin, walo ka menor de edad ang gipanghipos sa mga barangay tanod human maabti sa curfew sa milabay’ng gabii diha sa barangay Mabolo.
Ang maong mga bata giuli ra hinuon ngadto sa ilang mga ginikanan nga nagpangidaron og 10,15,17,16 ug 12 nga mga molupyo sa nagkalain-laing sitio sa maong barangay.
Si kapitan Reynaldo Ompoc sa pakighinabi sa Banat News nagkanayon nga ang maong curfew gipahigayon tungod sa kadaghan na sa nahitabong mga kagubot sa ilang dapit.
Dugang pa niini mao ang pagdaghan sa mga rugby boys diha sa iyang lugar sagad kanila anha magtapok sa North Reclamation Area. Ang mga ginikanan gipapirma og panaad nga ilaha nang bantayan ang ilang mga anak ug kun subli nila kining pasagdan hayan duna nay kasong ipasaka ang barangay batok kanila. Hinuon gibutyag ni Ompoc nga kasagaran sa mga ginikanan nalipay sa curfew nga ilang gipatuman sugod alas 10 sa gabii. – BANAT NEWS