CEBU, Philippines – Gikwestiyon ni Gobernador Gwendolyn Garcia ngadto sa bag-ong regional director sa Police Regional Office (PRO-7) nga si Chief Supt. Lani-O Nerez kun unsay hinungdan nga wala dayon makalingkod ang bag-ong direktor sa Cebu Provincial Police Office (CPPO).
Kini bisan pa man og iya nang gipirmahan ang appointment ni Sr. Supt. Jesus Gacquing nga maoy mahimong permanenting direktor sa CPPO hulip kang Sr. Supt. Carmelo Valmoria kinsa nadestino na sa Camp Crame.
Matud pa ni Garcia nga angayan na untang molingkod sa iyang katungdanan si Gacquing tungod kay usa na ka semana ang nakalabay human gipirmahan sa gobernadora ang appointment niini.
Si Nerez kinsa mi-courtesy call kagahapong adlawa ngadto sa gobernador misaad nga iyang lihokon aron mapadali ang paglingkod ni Gacquing.
Samtang giawhag usab sa gobernador si Nerez nga ipagawas dayon ang P1.5 milyones nga gahin gikan sa Camp Crame alang sa pagpalit og mga ekipo ingon man furnitures alang sa CPPO.
Gisuna sa gobernadora si Nerez sa maong gahin tungod usab sa pakisusi ni Peace and Order Capitol consultant, retired Col. Ceasar Veloso nga naglisod si CPPO acting director Erson Digal sa pagkuha sa maong gahin. - Chester Abadilla (BANAT NEWS)