CEBU, Philippines – Nakadawat karon og mga pagsaway si Mayor Jonas Cortes sa Mandaue tungod sa iyang desisyon pagpatak-op sa basurahan sa Umapad bisan walay klarong preparasyon.
Si Bise Mayor Carlo Pontico Fortuna nagkanayon nga nakadulot og krisis sa dakbayan sa Mandaue ang gihimong pagpatak-op sa Umapad dump site tungod sa kawalay social preparation, klaro nga stratehiya nga miresulta sa pagkalaundok sa basura sa kabalayan ug mga establisamento.
Laing naapektahan sa pagpasira sa basurahan ang 500 ka mga mamasurahay nga nawad-an og panginabuhian.
Ang Parkmall nga nahimutang sa reclamation area sa Mandaue nagreklamo usab tungod sa wala na makolekta nga mga basura sa mall.
Usa ka tigpaniid sa politika sa Mandaue nga mihangyong dili magpaila nagkanayon nga natarantar lamang si Cortes karon nga milusad og programa si Kongresista Nerissa Soon-Ruiz og “Basura Mo, Panginabuhian Ko.”
Gipasirad-an ni Cortes ang basurahan niadtong Hunyo.
Si Soon-Ruiz nagplanong modagan pagka-mayor sa dakbayan sa Mandaue, samtang si Cortes nagplanong magpasubli.
Sa pamahayag ni Cortes atol sa pagtak-op sa basurahan kini nagkanayon nga buot niyang ipatuman ang Ecological Solid Waste Management Act of 2003 nga nagmando pagbulagbulag sa mga basura gikan sa malata ug dili malata, samtang ang dili na mapuslan maoy ilahos sa basurahan sa Umapad.
Apan ang mga barangay sa Mandaue walay mga material recovery facilities hinungdan nga gipanglantawan nga mapakyas lamang ang maong programa.
Samtang si Soon-Ruiz mi-organisar sa 76 ka kahugpongan nga sakop sa Homeowners Consultative Assembly of Mandaue Neighborhood Organization (CAMANO). Gihugpong usab ang 50 ka mga Eco-Aid nga maoy mangolekta sa mga basura sa Mandaue.
Ang Mandaue Homeowner Credit Cooperative (MHCC) maoy mamalit sa mga basura nga mahimo i-recycle.
Ang matag residente nga makahatod og basura ngadto sa MHCC makadawat og coupon nga magtala sa gidaghanon sa basura ug kini ang basehan sa pagpa-miyembro niini.
Matag sakop mahimong makapangutang sa kantidad nga P5 mil ug ang basura mahimong ibayad niini. - Romeo Limpangog (BANAT NEWS)