CEBU, Philippines – Gumikan sa kaguol sa usa ka amahan nga wala makabayad ang mga nakautang kaniya milayat kini sa Marcelo Fernan Bridge kagahapon sa kaadlawon. Naguol kini kay ang gipa-utang gikan sa iyang gi-loan sa Social Security System (SSS).
Ang nagpakamatay mao si Dioscoro Lascuña, 49, minyo,ug residente sa Sitio Arca, barangay Pusok, dakbayan sa Lapulapu.
Base sa pasiunang imbestigasyon ni SPO1 Frederick Eslit sa Crime Against Person sa Lapulapu City Police Office nasuta nga mga alas 3 kagahapon sa kaadlawon usa ka kusog nga paglagapak ang nabati sa mga barangay tanod sa mini-park ilawom sa bridge ug ilang nakita nga si Lascuña naglutaw na gikan miambak sa ikaduhang taytayan. Si Lascuña nagtrabaho isip technician sa Mactan Apparel sa MEPZ 1.
Ang biktima milangoy padulong sa daplin sa baybayon, apan gumikan sa kakusog sa sulog sa Mactan Channel sa maong dapit gidala kini sa tunga nga bahin sa dagat ug didto napalgan sa daplin sa baybayon sa ubos nga bahin sa unang taytayan.
Gidali kini og dala sa Lapulapu City Hospital apan gideklarar kini nga dead on arrival sa mga mananambal.
Matud pa ni Jonamae Lascuña, anak sa biktima nga posibleng naguol ang iyang amahan nga hangtod karon wala pay mibayad sa iyang gipatanto nga kwarta gikan sa iyang gi-loan sa SSS.
Niadtong milabay’ng bulan, ang asawa sa biktima mihangyo nga mag-loan sa SSS alang sa ikadugang niini sa gasto sa pagpa-enroll sa tulo niini ka mga anak, apan daan na diay nga naka-loan si Dioscoro ug iyang gipa-utang sa pagtuo nga motubo kini ug ang tanan gisabot sa asawa ni Lascuña.
Sa dihang naningil kini wala pay mibayad sa ilang mga utang ngadto ni Lascuña. Gituohang nakahatag kini og kaguol sa biktima ug kagahapon sa kaadlawon kalit lang nga nahanaw si Lascuña ug mao na lang ilang nabatyagan nga dunay taho nga usa ka tawo ang milayat sa bag-ong taytayan ug nakompirmar nga si Dioscoro ang napalgan sa mga tanod nga wala nay kinabuhi.
Samtang si SPO1 Eslit mipadayag nga walay foul play nga ilang nakita sa kalawasan ni Lascuna. – BANAT NEWS