CEBU, Philippines – Laing P1.5 ka milyon ang gipagawas sa Kapitolyo alang sa katunga sa cash gifts ug midyear bonus sa mga kawani sa lungsod sa Tudela.
Si Provincial Treasurer, Atty. Roy Salubre nga mao karon ang kasamtangang nagsilbing municipal treasurer sa maong lungsod miingon nga na-release na ang maong pundo human mapirmahi ni Governor Gwendolyn Garcia sa wala pa kini milarga sa gawas sa nasud alang sa usa ka official trip.
Giingong personal nga mihangyo sa gobernador ang mga miyembro sa konseho sa Tudela nga gipangulohan ni Vice Mayor Clint Maratas.
Apan gitataw ni Salubre nga kadto lamang mga kawani nga gipang-hire ni Mayor Demetrio Granada ug walay labot ang mga kawani ni Mayor Rogelio Baquerfo ang makadawat niini.
Kini gumikan kay napakyas si Baquerfo pagpirma sa kasabutan nga isipon una kining pautang sa probinsiya aron lang malakip ang mga kawani niini nga mahatagan sa maong benepisyo.
Gawas sa mga kawani, ang mga elected official sa lungsod sa Tudela makadawat usab sa ilang katunga sa cash gift ug midyear bonus gawas lang sa nagkasunging sila si Granada ug Baquerfo. - Chester Abadilla (BANAT NEWS)