Mass feeding apil taga Canduman

CEBU, Philippines - Gihangop sa mga ginikanang biktima sa sunog sa barangay Umapad sa dakbayan sa Mandaue ang lakang nga ilakip sa Kaabag-Mandaue Inc.(KMI) ang ilang mga anak nga nagtungha sa Day Care Center (DCC)sa ilang barangay alang sa unang mass feeding program niini.

Ang mass feeding program   ipahigayon sa 27 ka barangay sa dakbayan human malagpot si Priscilla Boromeo, ang magtutudlong gidestino sa City Social Welfare and Services (CSWS) sa maong DCC.

Sa sayo pa nagtuo ang mga ginikanan nga palawayon lang ang ilang kabataan sa mga pagkaon unyang idulot atol sa mass feeding.

 Apan dihang nasayran nila nga lakip diay ang ilang mga kabataan, naglumpayat sa kalipay ang mga ginikanang kabus.

Ang maong mass fedding himoon karong Hunyo 12, 2009 atol sa kasaulogan sa tibuok nasud sa National Independence Day nga pangulohan sa unang ginang sa dakbayan   Mrs. Sarha Cortes kinsa maoy adviser sa KMI ug sa CSWS.

 Kining maong programa may tema nga “Kalingkawasan Batok sa Kagutom” aron mokunhod ang malnutrisyon sa dakbayan.

Ang mass feeding program nagtinguha nga makahatag og pagkaon sa 400 ka mga kabus nga bata sa matag barangay sa maong dakbayan.

Naglakip sa mga pagkaon nga idalit sa kabataan mao ang “pospas” o pagkaong sagulon ang humay, mga utanon ug uban pang sustansiyadong mga pagkaon.

Si Mrs. Cortes miingon nga ang mass feeding himoon na sa matag adlaw sa matag barangay. – BANAT NEWS