Sakop sa Mayor nang-harass

CEBU, Philippines - Nagpanon kagahapon sa hapon ang mga mamasurahay nga mga residente duol sa dump site sa barangay Umapad, dakbayan sa Mandaue tungod sa alegasyon nga gipang-harass sila sa mga tawo ni Mayor Jonas Cortes pinaagi sa pagsira sa maong basurahan nga nakapaundang sa ilang kapanginabuhian.

Gikatahong gihimo nga rason sa tawo sa mayor ang relihiyon hinungdan nga gisira ang agianan paigon sa basurahan.

Gipasanginlan nga maoy mi-harass sa mga residente sa barangay Umapad mao ang caretaker sa dump site nga si Myrna Flores.

Si Rainer Claridad, mibarog nga tigpamaba sa mga residente sa Umapad, mibasol ni Cortes nganong wala sila pahibaw-a nga ikandado diay ang ilang agianan.

Sumala pa ni Claridad nga daghang mga residente ang nawad-an og panginabuhian sa gihimong pagpadlak sa basurahan.

“Maayo unta’g dunay laing alternative nga gihatag ang siyudad sa Mandaue. Nya wala raba,” si Claridad.

Si Claridad nakapangutana unsaon na lang nila pagbuhi ang ilang mga pamilya karon nga gipasirad-an man ni Cortes ang basurahan.

Usa sa mga kauban ni Claridad nga midangop sa Banat News nagkanayon nga adunay higayon nga buksan og gamay ang agianan sa basurahan, apan kun sapoton ang mayor, pasirad-an na usab kini.

Sumala pa ni Claridad nga mga 500 ka pamilya sa barangay Umapad kang kansang panginabuhian nagsalig sa basura.

Usa ka traysikad drayber mitug-an sa Banat News nga wala na makaagi ang iyang traysikad tungod sa pagpapadlak ni Cortes sa dump site.

“Nagtuo man tingale si mayor sir nga supporter mi ni Congresswoman (Nerissa) Ruiz. Dunay uban diha nga nag-drive og traysikad nga miyembro man sa Basura Mo, Panginabuhian Ko, kana bang programa ni Ruiz, pero di man ta ko miyembro maapil man ko nga di na kaagi,” ang drayber og traysikad kang kansang ngalang gipugngan, nagkanayon.

Matud pa niini nga sukad nasirad-an ang karsada, wala na silay tarong kapanginabuhian.

Si Cortes, atol sa ceremonial closure sa basurahan, mipasabot nga gitak-opan ang maong basurahan tungod sa bag-ong programa karon sa siyudad paghingusog sa waste segregation nga anha himuon sa kabarangayan.

Sumala pa sa mayor nga kinahanglang lainon ang madunot ug dili madunot nga basura, samtang kadtong mga dili na magamit maoy angay dad-on sa dump site.

Tuyo sa mayor nga mapatuman ang Akta Republika 9003 kon Ecological Solid Waste Management Act of 2003.

Si Kapitan Zaldy Lumapas sa dihang nahinabi sa Banat News mipasalig sa pagsusi sa hitabo.

Apan matud niya nga lakip usab siya nabiktima sa pagpang-harass ni Cortes human gipadad-an og tulo ka polis ang iyang pagpakig-meeting sa mga ginikanan sa mga pupil sa day-care center sa barangay Umapad.

Si Lumapas nagkanayon nga human gi-terminate ni Cortes ang serbisyo sa magtutudlo sa day-care center sa Umapad, iyang gitigum ang mga ginikanan aron pahibaw-on sa gibuhat sa mayor. Apan nahibulong siya ug ang mga ginikanan sa kalit nga pag-abot sa tulo ka unipormadong sakop sa Mandaue City Police (MCPO) nga naminaw sa iyang estorya.

Matud sa kapitan nga human sa iyang estorya ngadto sa mga ginikanan, nanglakaw usab dayon ang mga polis.

Wala hinuoy laraw ang kapitan pagpasaka og kaso sa mga polis tungod kay wala man kini dautang gihimo ngadto kanila.

Apan nabati sa kapitan ang pagpanggukod ni Cortes ngadto kaniya tungod sa iyang pagka-loyal ni kanhi Mayor Thadeo Ouano. – BANAT NEWS