CEBU, Philippines – Nagproblema karon ang Poor Clare Monastery sa Tayud lungsod sa Consolacion gumikan sa nagkaanam na nga nagkagubang edipisyo nga ilang giokupar sulod na sa 34 ka tuig.
Ang maong pundok, usa ka grupong mitagana na sa ilang kinabuhi sa pag-ampo ug pagtabang sa mga nagkinahanglan og espirituhanong tambag kasamtangang nag-okupar sa usa ka karaan ug gubaon nang edipisyo diha sa Missionary Society of the Philippines sa maong barangay.
Sumala pa sa ilang Abbess (Superior) nga si Mother Maria Teresita Bajaras, sulod sa 34 ka tuig na nilang pagpuyo sa maong dapit gikaon usab sa mga anay ug bukbok ang maong edipisyo.
Nabalaka karon si Bajaras nga sa dili magdugay hasta ang mga bisitang manganha aron mag-ampo ug magpatambag mabutang sa peligro sa ilang receiving area gumikan kay nagkaanam na og gatagak ang ilang kisame ug atop.
Gumikan kay nabuhi ug nagsalig lang sila sa limos ug donasyon sa mga kahigalaan dili kini paigo bisan nalang sa pagpalit og materyales nga ilang magamit aron mapaayo kini hinungdan nga nanawagan ang grupo sa malumo og mga kasing-kasing sa pagtabang kanila sa maong proyekto. Masaligon si Bajaras nga bisan paman sa krisis karon duna pa gihapoy mga tawong andam nga motabang kanila. Plano sa monasteryo nga masugdan kini tulo ngadto sa unom ka bulan gikan karon. - Lesley Caminade (BANAT NEWS)