Klase sa kolehiyo gisibog sa June 15

CEBU, Philippines – Gumikan sa hulga sa sakit nga Influenza A(H1N1) virus nga mitakod na og kapin sa 30 ka tawo dinhi sa nasud nga naglakip na sa mga tinun-an sa usa sa mga unibersidad sa kauluhan, gimando sa Commission on Higher Education (CHED) kagahapon nga buksan lang ang klase sa kolehiyo sa Hunyo 15.

Lakip sa naapektahan sa maong kamandoan mao ang mga kolehiyo dinhi sa Sugbu sumala pa ni CHED-7 director Candelario Aytona.

Sa report sa ABS-CBN kagahapon, si CHED deputy director Julito Vitriolo mipahibalong mipagawas og direktiba si CHED chairman Emmanuel Angeles nga nag-oktaba sa tanang klase sa kolehiyo gikan sa Hunyo 8 ngadto na sa Hunyo 15.

Sumala pa ni Vitriolo, ang sakit nga A(H1N1) maoy usa sa hinungdan sa CHED sa pag-oktaba sa klase. Sumala pa niini nga buot hatagan sa CHED ang mga tinun-an nga gikan sa abroad nga maka-self quarantine aron pagsiguro kun nataptan ba sila sa maong sakit.

Kini sa ingon usab nga di matakdan ang ubang mga tinun-an kung ugaling nagdala na diay sila sa maong virus ug wala palang makabuylo og atake sa depensa sa ilang lawas.

Gawas sa maong rason, gikunsiderar usab sa CHED ang kahimtang karon sa panahon ug ang kalisod sa ubang mga ginikanan sa pinansyal nga panginahanglan para sa ilang mga anak. Gipasalig hinuon niining nagsubay pa sa target period ang postponement sa maong klase, bisan ang mga pribadong mga tunghaan mahimong moabli sa ilang klase sa Hunyo 29 na.

Wala hinuon maklaro sa direktiba kun apil ba ang mga elementarya ug high school sa maong direktiba, sanglit ang mga kolehiyo nasakop man sa CHED samtang ang elementarya ug high school sa DepEd.

Si Aytona nagkanayon nga ang matag semester kinahanglang 100 days gyud nga klase, mipasabot si Aytona nga samtang wala pa magsugod ang klase angayang magtigom og resistensya ug magpalig-on sa lawas ang mga tinun-an. - Edwin Ian Melecio ug report gikan sa The Freeman (BANAT NEWS)