Radaza suportado kun modagan sa 6th Dist.

CEBU, Philippines – Mipadayag og suporta ang mga sakop sa Association of Barangay Captains kon ABC sa maong dakbayan kun ugaling modagan pagka kongresista sa ikaunom nga distrito si Lapulapu City Mayor Arturo Radaza o ba kaha Kongresista sa giplanong Lone District sa dakbayan sa Lapulapu.

Si Lapulapu City ABC President ug Pajo barangay Kapitan Leo Mercado nga nahinabi sa Banat News namahayag nga atol sa ilang regular nga sesyon niadtong milabay’ng Miyerkules giendorsar sa mga kapitan si Radaza sa maong posisyon.

Matud pa ni Mercado maaprubahan man o dili ang balaudnong maghimong "Lone District" sa dakbayan sa Lapulapu suportahan nila si Radaza.

Ang balaudnong maghimong Lone District sa Lapulapu kasamtangan na karong naa sa hawanan sa Senado, kini naaprubahan na sa Committee on Local Government and Laws sa Kongreso sa milabay’ng semana.

Gipanglantawang dako og implikasyon sa kabarangayan sa Lapulapu kun ugaling si Mayor Radaza mapiling Kongresista ug ang iyang kapikas nga karon maoy barangay kapitan sa Mactan nga si Paz Radaza kinsa nagplano usab nga modagan sa pagkamayor mapiling mayor sa dakbayan sa Lapulapu.

 Kini tungod kay masentro na unya sa ilang mga barangay ang mga proyekto gumikan sa kadako og Countrywide Development Fund kon CDF sa usa ka kongresista.

Matud pa ni Mercado nga dili ikalimod nga sa pagdumala ni Mayor Radaza sa dakbayan sa Lapulapu sulod sa tulo ka termino dako ang kalamboang nahimo niini sa ilang lugar.

Gumikan niini nagkahiusa silang mga kapitan nga si Mayor Radaza maoy ilang ituboy pagka Kongresista sa dakbayan sa Lapulapu sa umaabot nga piniliay sa tuig 2010. - Bong Soriano (BANAT NEWS)