CEBU, Philippines – Balay naugdaw human gidauban sa usa ka PUJ driver ginamit ang usa ka botelyang bino nga giduslita’g posporo alas 2:00 pasado kagahapon sa kaadlawon diha sa 2nd St., sa San Antonio Villages barangay Apas ning dakbayan sa Sugbu.
Hingpit nga naugdaw ang usa ka andanang konkretong panimalay sa pamilyang Soñas human gidauban sa anak niining si Juan “Bebot” Soñas Jr. 56.
Si Soñas gibalhog diha sa Mabolo Police Station human boluntaryong mitahan sa iyang kaugalingon kagahapon sa alas 4:30 sa kaadlawon human makonsensya sa iyang nahimo.
Ang akusado nga nahinabi sa mga sakop sa tigbalita diha sa selda sa Mabolo Police Station miangkon nga siya maoy misunog sa ilang panimalay tungod sa iyang kalagot sa mga igsuon.
Matud pa niini nga hubog siya niadtong higayuna dihang iyang gidauban ang ilang balay ug gigamit niya pagduslit ang bino ug posporo hinungdan nga daling midilaab ug mikatap sa tibuok balay.
Wala hinuoy natahong dunay nasakitan o namatay sa maong tinuyong pagsunog sa balay.
Midugang siyang mao na kini ang ikaduhang higayon nga iyang giduslitan ang ilang panimalay apan sa una niyang laraw nga gigamitan pa niya og gasoline, napakgang siya sa iyang mga igsuon.
Gibutyag niini nga nagkaaway sila sa iyang mga igsoon niadtong Mayo human wala siya makaadto sa Manila dihang wala apili sa pagpalit og ticket aron unta sugaton ang abo sa patay’ng lawas sa iyang inahan nga gi-cremate didto sa America.
Dugang kahiubos niya sa iyang mga igsuon mao ang wala nila pagtabang kaniya nga malukat ang iyang driver’s license nga gisakmit sa Land Transportation Office (LTO-7) niadtong Mayo 19 sa miaging bulan.
“Naglagot nakong daan nila wala pa gyud ko tabangi dihang nangayo ko nila’g tabang nga malukat ang akong lisensya! Kay wala na koy panginabuhian,” sumala pa ni Soñas. Si SFO1 Milo Daculan, Fire Investigator sa Cebu City Fire Department nga nahinabi sa Banat News nagkanayon nga mokabat sa P200 mil ang kinatibuk-ang danyos. - Guam Logroño (BANAT NEWS)