CEBU, Philippines – Nagpaabot lamang si Lapulapu City Police Office OIC Director Sr. Supt. Mariano Natu-el Jr. og kamandoan gikan sa PRO 7 kun siya hulipan diha sa dakbayan sa Lapulapu.
Sa pakighinabi sa Banat News kang Natu-el kini namahayag nga bisan unsang orasa isip usa ka sundalo andam siyang mobiya kun dunay kamanduan.
Misabot usab si Natu-el sa sintimeyento sa mga opisyal sa kagamhanang lokal sa dakbayan sa Lapulapu ilabi na ni Mayor Arturo Radaza pagpili og opisyal sa kapolisan nga modumala sa seguridad sa ilang dakbayan.
Niadtong milabay’ng buwan nanamilit nang daan si Natu-el sa mga sakop human mohimo og resolusyon ang konseho nga nagsaway kaniya gumikan sa pagtukod niini og Barangay Intelligence Network nga walay koordinasyon kanila.
Si Lapulapu City ABC President Leo Mercado nagkanayon nga walay katungod si Natu-el pagtukod og kaugalingong BIN gumikan kay nalatid sa Local Government Code nga ang mga opisyal lamang sa barangay ang adunay katungod niini ug kini nagkinahanglan og pagtugot sa Hepe sa kapolisan ug sa Mayor.
Gumikan niini daghang mga kapitan sa barangay ang nangahibulong sa pipila ka mga sakop sa BIN nga anaa sa ilang barangay nga wala gani nila mailhi.
Laing gikasagmuyo ni Mercado mao ang insidenteng gipahunong ug gisitar siya ug si Mayor Arturo Radaza sa usa ka sakop sa BIN, diha-diha ilang nasayran nga wala gani makaila sa mayor ang maong BIN ug dili usab sila mga taga Lapulapu. - Bong Soriano (BANAT NEWS)