CEBU, Philippines – Mosumbalik pagpasaka og kaso ang duha ka mga langyaw’ng gidakop sa Criminal Investigation and Detective Group-7 nga gitumbok nga maoy tag-iya sa Egypt and Bounty Bar sa North Reclamation Area nga una nang gidudahan sa mga awtoridad nga ‘front’sa prostitusyon ug child trafficking.
Ang abogado sa usa ka German national ug laing Swiss National nga si Atty. Salvador Panelo miandam na sa mga kasong grave misconduct ingon man pagpangayo og damages batok sa CIDG-7.
Gihulagway niining illegal ang pag-aresto sa iyang mga kliyente kay matud pa niya di sila maoy mga tag-iya kundili mga customer ra sa maong bar.
Gani mibahad si Atty. Panelo nga apilon nila sa pagpasaka og kaso ang handling prosecutor nga si Glenda Lupian gumikan sa pagmagahi niini pagtugot nga makagawas sa detention cell aron mapahiling sa doktor ang iyang kliyente.
Matud pa niini na-traumatized ug buot nang magpakamatay ang iyang kliyente gumikan sa pag-harass kanila.
Gihagit hinuon ni Panelo ang kapulisan pagpasaka og kaso sa tinuoray’ng tag-iya sa maong bar ug dili ang iyang mga kliyinteng customer ra ug suod nga higala sa maong bar.
Sumala pa niya walay kongkretong ebidensya ang CIDG-7 batok sa iyang kliyente gawas lang sa gilagdaang pamahayag sa usa sa mga minor de edad nga babayeng naluwas gikan sa maong bar.
Nagduda si Panelo nga hinimo-himo ra kini ug igo lang gipapirma ang maong mga saksi nga nagduot sa iyang mga kliyente, matud pa niya giapil lang og dakop ang duha gumikan kay wala nila maabti ang tag-iya sa maong bar.
Karung Lunes mosang-at si Atty. Panelo og motion to bail aron matugutang makabutang og piyansa ang iyang mga kliyente. - Darrel Carumba (BANAT NEWS)