Koreano hubog napasok sa paril

CEBU, Philippines – Kapin upat ka oras nga napiit taliwala sa duha ka mga konkretong paril ang usa ka Koreano nga giingong hubog ug aksidenteng natagak diha sa Juana Osmeña Extension kagahapon sa kaadlawon.

Ang Koreano giilang si Lee Woo Jai naluwas sa mga sakop sa Emergency Rescue Unit Foundation nga migamit pa og power tools aron gub-on ang paril aron kini mahulbot.

Usa ka waiter sa restaurant duol sa gikahagbungan sa Koreano maoy nakadungog kaniyang nanampit og tabang hinungdan nga dali niya kining gisusi ug nanawag og mga polis.

Sumala pa sa gwardiyang si Ricardo Luga sa usa usab sa mga kan-anan sa dapit nakit-an niya kining nagdagan-dagan nga nagtiniil sa sayo pa nianang kaadlawon.

Ang biktima gikatahong nag-away sa iyang Koreanang asawa sa ilang balay sa Talamban nianang milabay’ng gabii, kasamtangan siya karong giatiman sa Chong Hua Hospital. - Edwin Ian Melecio (BANAT NEWS)