CEBU, Philippines – Napakyas gihapon ang Sulpicio Lines Inc. (SLI) pagtuman sa safety requirements nga gi-require sa Maritime Industry Authority (Marina) aron makabalik sa hingpit sa operasyon niini, samtang mo-usa na ka tuig sukad nalunod ang MV Princess of the Stars niadtong Hunyo 21, 2008.
Apan si Michael Go, bise presidente sa SLI sa dihang nahinabi sa Banat News mibutyag nga gikumpleto na nila karon ang mga rekisitos nga gipangayo sa Marina.
Sa report nga gisumiter ngadto sa Marina sa Magsaysay Ship Management Inc. sa consultancy agreement aron pag-review sa safety and quality management manuals sa SLI, si Capt. Agripino Milano Jr. miklaro nga ang SLI anaa pa sa first phase sa three-phase nga proseso aron makabalik na kini sa hingpit nga operasyon.
Ang SLI mikontrata sa Magsaysay aron makatuman sa rekisitos nga gipangayo sa Marina aron makabalik na ang cargo ug passenger operation niini. Apan si Milano nagkanayon sa Abril 13, 2009 nga sulat niini ngadto ni SLI vice president Jordan Go, nga ang ilang kontrata ‘consultancy’ lamang, dili ship management.
Si Milano mitambag sa SLI pagkuha og ISM certification gikan sa Marina o Marina-accredited nga certifying body.
Sumala pa ni Go nga gituman nila ang mga rekisitos nga gipangayo sa SLI, apan ang Manila na ang naglakaw niini. Si Capt. Nestor Ponteres, board captain sa SLI, mitug-an sa Banat News nga andam na ang tanang rekisitos ug naghulat na lang sila sa inspeksiyon ug approval sa Marina nga padayong nag-hearing alang niini.
Kahinumduman, 515 ka mga tawo ang missing, 350 ka patay’ng lawas ang na-recover ug 57 ang naluwas sa MV Princess of the Stars nga nalunod sa Romblon. - Brenda Batuto (BANAT NEWS)