CEBU, Philippines – Usa ka babaye mireklamo nga nawad-an og cellphone ug laptop human sayop nga gisulod ang iyang panimalay sa mga tinugyanan sa Philippine Drug Enforcement Agency (PDEA-7) atol sa gipahigayong hot pursuit operation niadtong Martes sa alas 8 sa gabii sa dalan A. Lopez, barangay Calamba ning dakbayan.
Si Nerissa Doncillo mialegar nga nahanaw ang iyang laptop ug cellphone ug nasayran niya kini sa dihang nahiuli siya sa panimalay nga mao pay iyang pagkasayod nga gironda diay ang iyang balay sa mga sakop sa PDEA-7.
Si Jessie Tabanao, tigpamaba sa PDEA-7 miangkon nga nasayop ang mga sakop sa PDEA-7 pagsulod og balay tungod kay mao kini ang gitudlo sa usa ka tawo nga nakakita sa ilang gigukod nga si Rico Rama.
Apan gitataw ni Tabanao nga wala manghilabot ang mga ahente sa ilang pagsulod sa balay ni Doncillo. Sumala pa ni Tabanao nga ang PDEA-7 mipahigayon og buy bust operation batok kang Rama, apan nakatimaho kini nga mga tinugyanan sa balaod ang namalit kaniya og ginadiling drugas, midalidali kini pagdagan.
Si Rama, matud ni Tabanao, apil sa watchlist sa PDEA-7. Sa paggukod sa mga ahente, adunay lalaki nga mitudlo sa pultahan sa balay ni Doncillo diin misulod si Rama hinungdan nga ila kining giguba ug gisulod, apan wala na didto ang suspetsado.
Nahibaw-an na lang sa mga ahente nga nasayop sila og sulod tungod kay ang pultahan sa balay ni Doncillo ug ni Rama nagtupad lamang. Si Rama giingong miambak sa bintana sa kuwarto sa iyang panimalay.
Pag-abot ni Doncillo, nahibulong na lang siya nga wala na ang iyang laptop ug cellphone. Si Doncillo ug mga sakop sa PDEA-7 nagkaatubang kagahapon sa Investigation and Detection Management Bureau (IDMB) diin gipresentar sa nawad-an ang iyang saksi.
Matud ni Tabanao nga ang pamahayag ni Doncillo ug sa saksi nagkasumpaki. Si Doncillo miingon nga adunay PDEA agent nga babaye nga nagdala og knapsack, apan ang saksi miingon nga beltbag lang ang dala sa ahente. - Lesley Caminade (BANAT NEWS)