CEBU, Philippines – Duha ang patay apil na ang usa ka 16-anyos nga lalaki ug naangol ang duha ka mga igsuon niining maguwang ug manghod human makuryentihe sa linya sa kuryente didto sa Sitio Menteryong Daan, barangay Bundol, lungsod sa Balamban niadtong Martes sa alas 8:45 sa gabii.
Ang mga namatay diha diha mao si Here Banguran, 16, tinun-an sa high school ug ang bayaw niini nga si Rebomafel Cangrejo, 26, pulos molupyo sa nahisgutang lugar samtang ang mga naangol mao ang magsuon nga si Gerome ug Niño Ian Banguran, ug igsuon sa namatay nga si Here.
Matud ni PO2 Cesar Climaco sa Balamban Police Station nga ang biktima gikan kini nga nalibang sa baybayon sa maong lugar ug paingon na unta kining mopauli pagkahuman sa dihang aksidenting nakasaghid sa nagbitay nga linya sa kuryente sa CEBECO-3 ug nagkirig kirig apan nakasinggit pa pagpangayo og panabang.
Ang iyang maguwang nga si Niño Ian ug manghod nga si Gerome nga nakadungog naglumbaanay og dagan aron luwason ang biktima ug sa dihang ila na unta kining bunloton aron makalingkawas sa kuryente nga nilikos sa lawas nalagpot kini human mao na usab ang nakoryentihan.
Ang ilang bayaw nga si Rebomafel nga nakadungog sa komosyon nagdali usab kining mitabang og dayong mibunlot sa buhok sa biktima aron makalikay sa kuryente apan milabtik ang wire ug didto na usab kini moigo sa iyang tiil ug mao na usab ang nakuryentihan.
Gisuwayan pa unta og dala ang mga biktima sa Balamban District Hospital apan gideklarar nga dead on arrival ang duha samtang ang magsuon nga Gerome ug Nino Ian igo lang nakaangkon og ginagmayng paso sa ilang kalawasan ug luwas na sa piligro. - Darrel A. Carumba (BANAT NEWS)