CEBU, Philippines – Mibahar karon ang gidaghanon sa mga ihawonong hayop sa ihawan sa dakbayan sa Talisay gumikan sa “backyard butchering” o inihaway sa mga kabalayan, matud ni Talisay City Administrator Richel Bacaltos.
Gumikan niini nagtukod karon og usa ka task force ang kagamhanan sa Talisay nga gitugyanan sa pagsikop sa mga karne nga inihaw sa kabalayan unya ihandos ngadto sa merkado nga dili na mag-agi og inspection sa mga meat inspector.
Ang maong task force magsugod na sa ilang trabaho ugma , Hunyo 5, matud pa ni Bacaltos.
Ang administrador sa dakbayan mibutyag sa Banat News nga kaniadto, moihaw ang ihawan sa dakbayan og 200-250 ka baboy matag adlaw, lahi sa pagkakaron nga maglisod na sa pag-abot og 200 ka baboy ang maihaw.
Matud pa ni Bacaltos nga kun magpadayon ang maong kahimtang hayan nga ang kitaon sa ihawan dili na unya makasapar sa mga galastohan sa maintenance, sama sa bayranan sa kuryente, tubig ug sa mga tawong nagtrabaho diha sa ihawan.
Gani nasaksihan na gyud sa nagdumala sa ihawan nga may mga adlaw nga alkanse sila sukwahi kaayo sa tinuoray nga kitaon sa maong ihawan kaniadto.
Si Bacaltos nagkanayon nga gumikan ning maong suliran, higpitan na sa kagamhanan sa dakbayan ang pagpatuman sa City Ordinance 2005-17 nga nagbatbat nga “no slaughtering of food animals outside the slaughter house”.(walay himoong pagpangihaw sa mga kan-onong hayop sa gawas sa ihawan sa kagamhanan sa dakbayan).
Ubos sa maong ordinansa gitahasan ang mga sakop sa task force sa pagsakmit sa karne nga masakpang dili inihaw gikan sa ihawan.
Ang task force mosuroy sa mga merkado sa siyudad ug susihon ang mga karneng gipamaligya kung aduna ba kini marka gikan sa meat inspector sa slaughter house.
Ang mga karne nga walay marka maoy sakmiton kay tataw nga gikan kini sa gawas sa ihawan.
Gawas sa merkado ang task force mosuroy usab ngadto sa kabalayan ilabi na sa mga balay sa mga negosyante og karne ug sutaon kung wala ba kini mag-ihaw diha lang sa ilang balay .
Ang meat task force gipangulohan ni Konsehal Aaron Capala, isip tsirman, kauban niya ang mga polis, meat inspector, ug mga representante gikan sa treasurer’s office ug legal office. – BANAT NEWS