Bombero ipaubos sa 'state of calamity'

CEBU, Philippines – Gisugyot ni Majority Floor Leader Victor Biano sa konseho sa dakbayan sa Mandaue nga ipaubos ang Bureau of Fire Protection (BFP) sa “state of calamity” (SOC) aron makapagawas kini og salapi nga ikapamalit og mga bag-ong ekipo niini.

Atol sa ilang sesyon sa miaging adlaw giwaldas ni Biano sa hawanan sa ilang session hall ang nasayran niyang reklamo gikan sa taga barangay Umapad nga matud pa ang nakapadako sa sunog sa maong barangay niadtong Mayo 24, 2009 sa gabii, mao ang pagkawalay tubig sa mga trak sa bombero nga mitubag sa maong alarma.

Matud pa ni Biano nga imbis tubig ang mosirit, hangin ray nag-aso-aso sa hose sa mga bombero hinungdan nga murag gitayhopan ang kayo ug misamot ang pagkaylap niini .

Apan mikisikisi si SFO3 Jose Laureto sa pagpanghimakak niining maong pasangil .

Ang gipasanginlan ni SFO3 Laureto sa kawalay tubig sa ilang hose mao ang kawalay tubig sa fire hydrant sa Metropolitan Cebu Water District (MCWD) sa mga sitio Mangga ug Lemonsito sa barangay Umapad atol sa maong sunog.

Mahinumdoman nga mikabat sa 280 ka balay ang nangaugdaw sa kayo tungod kay matud pa ni SFO3 Laureto, nga mag-estambay una sila’g 30 minutos una mapuno ang ilang trak sa tubig didto sa fire hydrant busa inigbalik nila didto sa nasunogan dako na kaayo og agi ang kayo.

Giangkon usab niya nga ang ilang trak ug hose pulos na mga karaan kay gigamit na nila kini sukad pa niadtong 1960 ug sa pagkakaron dili na maayo og performance ang maong mga kahimanan kun gamiton .

Si SFO3 Laureto nga nagkapuliki sa pag-eksplikar sa mga konsehal bahin sa dako nilang lapso nga nahimo sa sunog sa Umapad nakakatarungan usab nga ang kagagmay sa agianan sa maong barangay nakatampo usab og dako sa kadugay napawong sa kayo. Sa paningkamot niya nga mapanalipdan ang dungog nilang mga bombero, gibasol niya ang taga Umapad nga gumikan kuno sa kataspokan niini motambong og mga seminar bahin sa sunog maoy hinungdan nga wala gayud kini nahimo dihang nasunog ang ilang lugar.

Apan bisan pa niini maisugon si Biano sa pagpasar sa iyang resolusyon sa hingpit nga pagpaubos sa SOC sa kabomberohan sa dakbayan sa Mandaue. – BANAT NEWS