Hapsay pagbukas sa klase

CEBU, Philippines – Hapsay ug malinawon ang pagsugod sa klase sa pampublikong mga tunghaan sa dakbayan sa Sugbu kagahapong adlawa gawas lang sa mga ginagmay'ng aberya sa pagpangita sa mga lawak sa mga ginikanan nga naghatud sa ilang mga anak.

Kini maoy kinatibuk-ang paghulagway ni Cebu City Schools Division Superintendent Doctor Lorna Rances sa iya usab nga gihimong monitoring.

Gipadayag hinuon ni Rances nga natural lang ug dili malikayan ang ginagmay nga mga problema nga motumaw atol sa pagsugod sa klase tungod kay maglibog pa pagpangita sa ilang mga classroom ilabi na sa mga transferees, kakuwang sa mga lingkuranan, ug uban pa.

Apan nagtoo si Rances nga kini nasulbad ra sulod mismo sa tunghaan hinungdan nga wala maabot sa iyang buhatan.

“Wa may mga major problem gyud nga ilang gitawag diri, sa ato pa, kung dunay mga problema manageable ra within the school level,” sumala ni Rances.

Dunay kapin 50 ka mga school supervisors ug health personnel ang milibot sa mga tunghaan alang sa monitoring ilabi na sa urban barangays sa dakbayan nga maoy sagad makasinati og mga suliran sa pagbukas sa klase.

Unang gipatudlo ni Rances ngadto sa mga tinun-an mao ang pagpanglimpyo sa kaugalingon ug ang kalabot sa A(H1N1) flu virus ang ilang seguridad.

Samtang sa dakbayan sa Mandaue, gipahibalo ni Virginia Zapanta, ang division school superintendent nga bisan nagsugod na ang klase nanawat pa gihapon sila og mga enrolees.

Gikatahong midaghan ang mga tinun-ang nagpa-enroll sa public schools karong tuiga gumikan sa nasinating global crisis tungod kay daghang mga ginikanan ang nangataktak sa trabaho.

Samtang ang kapolisan mihulagway usab nga malinawon ang unang adlaw sa pagbukas sa klase, si Sr. Supt. Patrocinio Comendador sa Cebu City Police Office mitug-an nga magpadayon ang ilang police visibility duol sa mga tunghaan.

Mao usab kini ang nasinati sa mga kalungsoran sumala pa ni Supt. Erson Digal, ang officer-in charge sa Cebu Provincial Police Office kinsa sa sayo pa mimandong pabutangan usab og police assistance center ang mga central schools sa matag lungsod.

Nakig-alayon usab sila sa mga local nga opisyales sa kabarangayan aron matabangan ang mga bata sa ilang pagsulod sa unang adlaw sa klase. (Uban sa report nila ni Romeo Limpangog ug Guam Logroño)