Namatay kay giluba sa kainom

CEBU, Philippines - Patay dihadiha ang usa ka lalaki human unaya og luba sa iyang kainom sa barangay Anapog, lungsod sa Pinamungahan kagahapon sa alas 3:00 sa kaadlawon.

Ang biktima mao si Emmanuel Antipuesto Alfar, 34, nga taga Anapog, samtang ang suspetsado mao si Rogelio Alqueza Gabato, 53, silingan sa biktima.

Sa pasiunang imbestigasyon sa kapolisan nasayran nga sa wala pa ang maong hitabo, nakig-inom ang biktima sa suspetsado ug nagkinantahay pa sila sa videokehan ni Felix Dacay.

Matud pa sa mga saksi nga bisan nanira na ang tindahan, padayon lang gihapong nag-inom sa gawas ang duha.

Apan nianang pagka-alas 5:00 sa buntag gipukaw na   ang suspetsado ug mibutyag kini nga iyang napatay ang biktima.

Si Dacay nga puwerting lisanga, nagpakitabang sa iyang mga silingan ug gidala sa hospital ang biktima apan pag-abot nila sa tambalanan, gideklarar na kini nga ‘dead on arrival’ sa doctor tungod sa usa ka samad sa tiyan niini.

Samtang ang suspetsado bulontaryong mitahan ngadto sa kapolisan sa Pinamungahan Police Station uban sa 15 polgadas nga kutsilyong gigamit niya sa pagpatay sa biktima. - BANAT NEWS