Building sa Norkis sa Mandaue nasunog

CEBU, Philippines - Nakapabalaka sa mga molupyo ang nagsunod-sunod nga sunog sa dakbayan sa Mandaue diin ang labing bag-o niini mao ang nahitabo didto sa dalan A. S. Fortuna sa barangay Bakilid, sa maong dakbayan sa miaging kaadlawon.

Si FO2 Nilo Cosedo sa Bureau of Fire Protection (BFP) sa Mandaue mibutyag sa Banat News nga mikabat og P1.1 milyones ang kantidad sa nangaugdaw nga mga butang sulod sa Norkis Trading Industries sa dalan A.S. Fortuna.

Matud pa niya nga ang alarma ilang nadawat alas 3:18 sa miaging kaadlawon ug ilang nakontrolar ang kayo sulod sa 13 minutos.

Ang maong sunog gipaubos dayon ni City Fire Marshall Oscar Mayol sa 3rd alarm hinungdan nga dali kining napawong kay midugok ang mga kabomberohan gikan sa ubang lugar aron pagpawong sa kayo.

Lakip sa mga mitabang sa pagpakigsangka sa kayo mao ang Filipino Chinese Volunteer Fire Brigade, Bureau of Fire Protection sa dakbayan sa Sugbo, Liloan, dakbayan sa Danao, Consolacion, Cordova, Emergency Rescue Unit Foundation, (ERUF) ug uban pa.

Si FO2 Cosedo nagkanayon nga sa gihimo nilang imbestigasyon, ilang   nasuta   nga ang kayo nagsugod sa sulod sa accounting office sa administration building sa nahisgotang establisamento.

Padayon pa nilang gisuta karon ang hinungdan sa maong sunog ug maayo nalang kay walay kinabuhing nakalas.

Dili pa dugay nasugamak usab sa dakong sunog ang barangay Umapad sa maong dakbayan. - BANAT NEWS