CEBU, Philippines - Nabalhog sa Mabolo Police Station ang usa ka 19-anyos nga inahan sa dihang gipadakop sa iyang mga igsuong babaye kagahapon sa buntag human gibaligya sa kantidad nga P300 ang iyang anak nga lalaki nga usa pa ka tuig ug tulo ka bulan niadtong Biyernes sa gabii.
Ang gidakop sa kapolisan giila nga si Josephine (apelyido gipugngan) taga Sitio Kalinaw, North Reclamation Area, barangay Carreta ning dakbayan human duha niya ka igsuong babaye mi-report sa kapolisan nga gibaligya ang kaugalingong anak niini ngadto sa usa ka Roger Demol.
Si Madel ug Vincent, mga igsoon ni Josephine nagkanayon nga nabalaka sila sa ilang pag-umangkon human ilang nahibaw-an nga ang ilang igsuon nabisan asa na lang milakaw nga wala niini ang anak.
Si Madel nagkanayon nga nakadesider sila sa pagpangutana sa kanhi amo sa iyang igsuon nga si Josephine Paglinawan nga tag-iya’g karenderya diin ang iyang igsuon nagtrabaho kun duna ba kini nahibaw-an kun asa ang anak sa ilang igsuon.
Matud pa ni Madel nga si Paglinawan mitug-an nga ang iyang igsuon mihangyo kaniya nga ibilin ang iyang anak apan iya kining gibalibaran hinungdan nga gipangutana niini ang usa ka bus driver nga kustomer sa ilang karenderya.
Gikataho nga ang drayber misanong sa hangyo ni Josephine nga unang nangayo og P100 ug isunod na lang unya ang dugang bayad nga P200.
Atol sa pagsuwat ning balita sila si Madel, ang nagpaabot pa sa pagbalik sa wala pa mailhing drayber aron sa pagsuta kun naa ba niini ang maong bata human gibaligya sa iyang igsuon.
Sumala pa ni Madel nga ang iyang igsuong babaye hugot nga nanghimakak sa maong alegasyon ug mirason nga wala niya gibaligya ang bata ug igo lang gihatag niini ngadto sa drayber nga walay bayad.
Apan si Madel, nagkanayon nga duna sila'y daghang mga tawo nga makasulti batok sa iyang igsuon nga nakadawat gyud kini og bayad gikan sa drayber sa pagbaligya sa iyang usa ka tuig ug tulo ka bulang anak nga lalaki.
Giangkon hinuon ni Madel nga ang iyang igsuon mihangyo kaniya nga anha na lang niini ang iyang anak nga lalaki apan iya kining gibalibaran hangtod nga miabot sa punto nga nagkasabot ang iyang igsuon nga si Josephine ug laing igsuong si Vincent nga ibilin lang sa panimalay niini ang iyang bata kun dunay lakton.
Apan ang duha matud pa ni Madel nga nagkaaway human si Josephine nasakpan ni Vincent nga nanghilabot sa iyang mga sapot hinungdan nga human sa insidente si Josephine miadto sa ilang inahan sa Opon ug mihangyo kun mahimo bang ibilin ang iyang anak apan gibalibaran sa ilang inahan.
Gipadayag niini nga nabalaka sila sa iyang pag-umangkon human ang iyang igsuong si Josephine magsige na lang og kuyog og laing mga lalaki human gibiyaan sa lalaking nakapa-anak niini.
Magsige na lang og laag nga walay interes sa pagbantay ingon man pag-amuma sa iyang anak hinungdan nga sila naningkamot nga makit-an pagbalik ang ilang pag-umangkon.
Giklaro niini nga andam nilang amumahan ang bata ug sa pagkakaron wala sila'y planong pasakaan og kaso ang iyang igsuon kinsa naa pa karon sa Womens Desk sa Cebu City Police Office. - BANAT NEWS