CEBU, Philippines – Mikabat sa P2 milyones kapin ang gipagawas nga kuwarta sa Department of Budget and Management (DBM) sa paningkamot ni Kongresista Nerissa Soon Ruiz alang sa sistema sa panubig sa dakbayan sa Mandaue.
Ang P800 mil sa maong gahin gamiton alang sa pagpalapad sa Casuntingan Community Livelihood Multipurpose Cooperative (CCLMC) nga maoy mamalit og dugang mga bomba sa tubig ug uban pang kahimanan sa panubig.
Kini sa tinguha nga kasilbihan ang mga miyembro niini nga nagpuyo sa barangay Maguikay.
Samtang ang P1.350 milyones gamiton usab alang sa tukorong mga poso artesiano sa Maguikay, Alang-alang, Guizo, Umapad, Tingub, Pagsabungan ug Lanipga, usa ka bukirang barangay sa Consolacion.
Mahinumdoman nga ang CCLMC sa sinugdan gipadagan lang sa pipila ka mga opisyal sa Casuntingan kinsa nangandoy nga makabaton og tubig nga mainom tungod kay wala makaabot ang supply sa MCWD didtong dapita.
Ang unang natukod nga poso artesiano niini giinugorahan ug gisubhan niadtong Enero 27, 200l nga gitambungan mismo ni Kongresista Soon Ruiz sa ika-unom nga distrito sa Sugbo.
Human niadto, sa kapin tuig nga kalihokan sa maong kooperatiba gitabangan na kini sa kagamhanan sa dakbayan sa Mandaue ug sa lalawigan sa Sugbo kauban ang Aboitiz Group Foundation hangtod nga nakapamalit kini og mga kahimanan alang sa lapad nga serbisyo sa tubig nga mainom diha sa maong dakbayan.
Ang maong kooperatiba may pundo na nga mikabat sa himabaw nga P4 milyones, apan bisan pa niini padayong misuporta ang kagamhanan ilabi na si Kongresista Soon Ruiz matud pa ni Rolando Ceniza, chairman of the board sa CCLMC. - Bong Soriano (BANAT NEWS)