CEBU, Philippines – Usa ka wala hiilhing drayber sa taxi gipasanginlang mikawat sa P50 mil kapin nga kantidad sa welding machine didto sa pier 1, sa may Legaspi Extention, barangay San Roque dakbayan sa Sugbo kagahapon sa alas 9:00 sa buntag.
Si PO2 Pelizardo Gallego sa Waterfront Police Station miila sa biktima nga si Rosalim Labrador, hingkod, nga taga barangay Tipolo, dakbayan sa Mandaue.
Si PO2 Gallego mibutyag sa Banat News nga misakay ang biktima kauban sa iyang ig-agaw sa usa ka taxi paingon sa pier 1 dakbayan sa Sugbo gikan sa barangay Tipolo, dala ang ilang mga kahimanan sa welding nga nagkantidad og P50 mil nga gipasok sa baggage compartment sa taxi.
Apan pagkahuman nila og bayad sa plite dihang nanaog na sila sa pier 1, gimandoan nila ang drayber nga paablihan nila ang baggage compartment aron idiskarga ang ilang welding machine, apan mibulhot og padagan sa taxi ang maong drayber.
Sa pagtan-aw nila kay isuwat unta nila ang plate number niini, nasuta nila nga wala diay kini gikabit nga plate number sa taxi.
Busa walay nahimo ang biktima gawas sa paghilak ug nagtibi kining misumbong sa maong hitabo ngadto sa kapolisan.
Ang kapolisan mipahinumdom sa publiko nga kun dili makakita og plate number sa taxi , anaay body number niini nga dagko kaayong pagkasuwat sa mga kilid ug sa likod sa sakyanan. – BANAT NEWS