CEBU, Philippines – Nanawagan ang mga sakop sa Hunta Probinsiyal ngadto sa Department of Trade and Industry nga pasirad-an o di ba kaha i-ban ang mga tindahang namaligya og mga substandard nga mga produkto.
Partikular na niadtong mga ekipong walay selyo nga aprubado sa Philippine National Standard kon PNS o Import Commodity Clearance kon ICC.
Kini aron dili na makapalit ang mga konsumidor niining mga substandard nga produkto nga makadaot sa panglawas sa tawo ug posibleng maoy hinungdan sa mga aksidente sa mga panimalay ug kadaut sa kabtangan.
Sumala pa ni Provincial Board Member Juan Bolo, ilang nahibaw-an gikan sa Bureau of Fire and Protection nga mga substandards nga mga produktong sama sa electric fans, series lights, batteries ug uban pa maoy sagad nga hinungdan sa mga sunog nga miigo dinhi sa rehiyon.
Matud pa ni Bolo nga angayang paminawon ang pahimangno sa BFP nga nagkanayon nga nag-ingong “makadaginot man tuod ang mga konsumidor apan minilyon usab ang danyos sa higayon nga moulbo ang sunog.”
Ang mga opisyales sa BFP nitataw nga maminusan lamang o dili man mapugngan ang daghang insidenteng susama niini kun likayan ang pagpalit niining mga substandard nga produkto.
Ang mga substandards nga mga produkto matud pa sa BFP daling moinit, daling momugna og sunog gumikan kay gagmay ang mga wire, capacity ug daling mo-overload.
Subay niini, si Bolo nanawagan usab ngadto sa DTI nga pahugtan ug instriktuhon pa ang ilang pag-monitor sa mga electrical products nga kanunay’ng paliton sa mga konsumidor. - Chester Abadilla (BANAT NEWS)