Nerez: Kampanya vs. NPA hingusgan

CEBU, Philippines – Bag-ong pangulo sa Police Regional Office 7 mimandong hingusgan ang kampanya batok sa insurhensya sa rehiyon ug sa pagpangandam sa seguridad sa umaabot nga piniliay karong sunod tuig.

Si Chief Supt. Lani-O Nerez maoy mihulip kang Chief Supt. Federico Terte kagahapong adlawa atol sa turnover ceremony kagahapon sa Camp Sergio Osmeña Sr., si Nerez una nang gipaboran sa mga LGU officials sa maong posisyon kun itandi sa laing duha pa ka mga heneral nga mas senior pa kaniya sa Philippine Military Academy.

Ang maong kalihukan gitambongan ni PNP Chief Jesus Versosa Jr. uban sa mga opisyal sa kapulisan ug pamilya nila ni Terte ug Nerez.

Si Terte kinsa nagserbisyo sa PNP sulod sa 36 na ka tuig nagpasalamat sa tanang suportang nadawat gikan sa mga sakop ug sa LGU sulod sa tulo ka buwang pagka-direktor sa PRO-7.

Atol sa paglingkod ni Terte duha ka polis ang iyang gipangtaktak sa serbisyo, walo ang na-demote sa ranggo, 15 ka mga administrative case ang gibasura, 137 ka mga tawo ang napasakaan og illegal possession of firearm, ingon man 45 ka mga armas ang nasakmit ug uban pang mga kalampusan sa paggukod sa illegal nga drogas ug illegal nga sugal.

Si Nerez nga kanhi director sa Cebu City Police Office kaniadto mipasalig nga hingusgan usab ang kampanya batok sa tanang illegal nga kalihukan pagpabalik sa moral sa kapulisan ug ang pagpatunhay sa kahapsay ug kalinaw. - Guam Logroño (BANAT NEWS)