CEBU, Philippines – Moduso og motion for reconsideration ang mga Martinez kalabot sa desisyon nga gipakanaug sa House of Representatives Electoral Tribunal kon HRET pagbasura sa election protest nga gi-file ni Celestino "Tining" Martinez III batok ni 4th District Congressman Benhur Salimbangon.
Sumala pa ni kanhi 4th district congressman karon Bogo City Mayor Celestino "Junie" Martinez Jr., dili pa sila mosurender sa maong kaso.
Matud pa niini nga kun ang ilang motion for reconsideration ibasura gihapon sa HRET, ila kining isang-at ngadto na sa Korte Suprema.
Gipasabot ni Martinez nga dako gyud ang ilang pagtuo nga si Tining Martinez mao gyud ang tinuoray nga nakadaug sa pagkakongresista sa ikaupat nga distrito niadtong 2007 election.
Matud pa niya angayang imbestigahon gyud ang maong reklamo nga ilang gihulagway’ng “serious fraud and irregularity” sa election sa Bogo city, lungsod sa Daanbantayan ug Madridejos.
Si Salimbangon midaog batok kang Tining Martinez pinaagi sa 104 ka botos lamang niadtong 2007 apan sa resulta sa recounting sa HRET misaka ngadto sa 453 ka botos ang labaw ni Salimbangon.
Si Salimbangon nakakuha og 67,108 ka botos batok kang Martinez nga 66,655 ka botos lamang.
Samtang si COMELEC-7 regional director Rene Buac mitumbok nga gikinahanglan nga moatubang sa makuting imbestigasyon ang mga opisyales sa lungsod sa Bogo, Daanbantay ug Madredijos tungod sa nakita sa HRET nga kahiwian sa nakalabay’ng election.
Hinuon miingon si Buac nga posibleng ang Law Department sa Comelec na ang mopadala og mga tawo aron maoy moimbestigar sa mga opisyal sa Bogo, Daanbantayan ug Madredijos.
Si Salimbangon sa pakighinabi sa Banat News nagkanayon katungod sa mga Martinez ang mopasaka og mosyon apan mipadayag kining andam nga atubangon ang maong mosyon. Giklaro usab niyang di para kaniya ang maong kadaugan kundili alang sa mga konstituwente sa iyang distrito. - Chester Abadilla ug Brenda D. Batuto (BANAT NEWS)