CEBU, Philippines – Patay diha-diha ang usa ka menor de edad human pusila sa usa ka wala mailhing lalaki samtang nagkaon sa sitio Tinabangay, barangay Mambaling pasado alas 12 sa kaadlawon kagahapong adlawa.
Giulo pagpusil ang 16-anyos nga gipatay giingong residente sa dalan B. Aranas sa sitio Carvarex sa barangay Duljo-Fatima ug wala na madala sa tambalanan, padayon pang giila sa kapolisan ang mamumuno.
Giingong dunay daghang reklamong pagpangawat batok sa biktima base sa record sa Gender and Development Council sa maong barangay.
Base sa imbestigasyon sa kapolisan nasayran nga nagkaon sa usa ka kan-anan daplin sa karsada ang biktima dihang miabot ang wala mailhing tawo ug gidul-itan kini pagpusil diha sa ulo.
Wala pa matino kung unsay motibo sa pagpatay sa biktima apan usa sa gilili mao ang posibleng panimalos sa mga naagrabyado niini.
Samtang sa laing bahin, samdan ang usa ka drayber human pusila sa higala tungod sa pangomedya nga wala mauyuni sa suspek diha sa Oprra sa barangay Kalunasan sa milabay’ng gabii.
Giila ang napusilan sa paa mao si Mario Maromas, 42, taga sitio Ponce barangay Capitol Site, samtang ang suspek mao si Michael Domosmog.
Sa imbestigasyon sa kapolisan giingong mikapyot ang suspek sa pasaheroan sa biktima ug gikomedyahan sa naulahi sa pag-ingon “ayaw pasudla kay kawatan na.”
Gikatahong nasuko ang suspek ug gitubag ang biktima sa pag-ingon “ayaw pag-ingon ana bay kay daghan tawo” dungan sa paglayat gawas sa sakyanan. Apan sa dihang mogarahe na dangtan pila ka oras ang biktima kalit nga mibutho ang suspek ug mipusil kaniya makadaghang higayon apan sa paa ra kini maigo.
Daling midagan ang suspek samtang gidala sa tambalanan si Maromas.
Sa laing pagpamusil, usa ka Junjie Paso,20 , taga dalan Belgium sa barangay Sawang-Calero ang gisulong sa gikaaway’ng si Warlie Laborte nga iyang silingan.
Gikatahong nasuko ang suspek sa biktima human masayring gisuwayan og dunggab ni Laborte ang iyang higala nianang buntag, ang biktima giingong buot lang untang mobawos pagdunggab sa maong tawo human usab siya dunggaba niini kaniadto. - Lesley Caminade (BANAT NEWS)