Pag-exempt sa buhis sa water districts daghang misuporta

CEBU, Philippines – Nag-abot ang nagkalain-laing mga representanti sa Local Water districts (LWD) sa nagkadaiyang rehiyon sa tibuok nasud aron pagsuporta sa Senate Bill 3125 ni opposition Senator Panfilo “Ping” Lacson nga tumong mao ang pag- exempt sa mga water districts pagbayad sa buhis.

Sa gipahigayong consultative meeting ni Lacson kagahapong adlawa nagkanayon nga daghan ang nagpasalamat ug mipadayag og suporta sa maong balaudnon.

Gisugyot ni Lacson nga imbes ibayad sa buhis, gamiton nalang kini pagpalit og mga modernong ekipo alang sa water system sa matag water districts alang usab sa kaayuhan sa serbisyo sa publiko.

Samtang si Delfin Hilario, presidente sa Philippine Association of Water Districts Inc. nagkanayon nga ang maong bill makatabang og dako sa tanang water districts gumikan kay di mabug-atan ang mga konsumidor sa ilang mga bayrunon kung mahinayong di na pabayron og buhis ang maong sector.

Napanglantawan usab ni Hilario nga kun mapalapdan pa ang serbisyo sa patubig mas daghan usab ang makatrabaho.

Si Lacson nagkanayon nga kun maaprubahan ang maong Senate Bill mas molambo pa ang serbisyo sa tanang water districts.

Sumala pa sa senador nga sa milabay’ng katuigan napasar na ang balaod nga nag-exempt sa water districts pagbayad og buhis ug kini mao ang Presidential Decree 198.

Apan gumikan sa mga daghang balaod nga napasar nga nag-alkontra niini wala gyud kini matilawi sa maong sector hinungdan nga subli niyang gipasaka ang maong balaudnon sa Senado aron hingpit kining mapatuman.

Sa balaudnon ni Lacson, daghang mga probisyon sa PD 198 ang amendahan aron di mosukwahi sa ubang mga napasar nga balaod. - Lesley Caminade (BANAT NEWS)