Granada, armas nakalusot sa barko

CEBU, Philippines – Granada, armas ug mga bala nakalusot sa pantalan sa Ozamis City apan nasakmit kini dinhi sa Sugbu lakip na ang nagdala niini human ma-detect sa x-ray machine sa Cebu Ports Authority sa dihang mosakay na usab kini og laing barko padulong sa Leyte diha sa Pier 4.

Giaresto dayon sa mga sakop sa Regional Maritime Group-7 si Ranel Malig-on, 33, usa ka mananagat nga taga Tibagon-Malangas, Sibugay Zamboanga del Sur.

Usa ka granada nga giputos og panapton, usa ka paltik nga .38 revolver uban sa upat ka mga buhing bala, 17 ka mga buhing bala sa kalibre .45 ug usa ka magazine sa .45 kalibreng pistola.

Si Malig-on nadakpan nila ni SPO1 Crisanto Niñal ug PO1 Hadji Sansolis, pulos mga sakop sa maritime police kini human ang usa ka operator sa x-ray machine nga si Andrian Flores daling mi-report nga dunay kadudahang kargamentong ilang na-detect nga iya sa usa sa mga pasaherong mosakay sa Superferry 12 paingon sa Leyte.

Matud pa ni PO3 Napoleon Tañeo sa maritime police kuyog sa iyang asawang si Mercideta uban ang duha ka mga gagmay’ng anak ang suspek dihang gi-hold tungod sa maong kontrabando.

Ang maong mga kontrabando gisulod sa usa ka sako ug uban pang mga butang, sa sulod sa sako didto usab ang gamay’ng taro nga maoy gisudlan sa granada, .38 rebolber ug mga bala.

Wala hinuon mohimakak si Malig-on nga iya ang maong armas ug granada ug nangangkong para lang unta kini depensa sa iyang kaugalingon ug sa iyang pamilya gikan sa mga dautang tawo.

Si Malig-on dihang miatubang sa mga sakop sa media sa Regional Maritime Group Office nagkanayon nga ang maong armas gipanag-iya sa iyang igsuon nga kabilin pa sa ilang amahan.

Sumala pa niini nga mibiya sila didto sa ilang lugar aron unta dalhon ang iyang pamilya sa barangay Garaopay, Ormoc City sa Leyte aron malayo sa peligro gumikan sa iyang kahadlok nga sila na usab unya ang patyon sa mga rebeldeng Muslim sa ilang lugar.

Matud pa niini nga ang iyang igsuong lalaki nga manindahay og bibingka gipatay niadtong miaging tuig human pasanginling espiya sa militar.

Nunot sa iyang kahadlok misibat sila sa nahisgutang lugar niadtong Huwebes sa buntag ug misakay sila’g bus de pasaheroan gikan sa ilang lugar ug naabot sa Ozamiz City pagka-alas 8:00 sa gabii sa samang adlaw dayon sakay sa barko nga Trans-Asia 2 gikan Ozamis City padulong dinhi sa Cebu.

Matud pa niya wala gyud masakpi ang maong granada ug armas sa iyang taro diha sa x-ray machine sa Ozamiz.

Miabot sila dinhi sa Sugbu alas 8:00 sa buntag kagahapon ug milukat dayon og ticket sa Pier 4 aron mosakay sa Super Ferry 12 pagka-alas 10, apan sa pag-agi sa ilang kargamento nasakpan ang maong mga armas.

Ang akusado hugtanong mihimakak nga sakop sa bisan unsang grupo sa mga rebelde ug bandido sa Zamboanga.

Matud pa niini nga usa lang siya ka ordinaryong mananagat sa ilang lugar ug buot lang siyang mopalayo sa ilang dapit ug ang armas alang lang sa pagpanalipod sa iyang pamilya.

Apan kagahapon gipasakaan siya og kasong kalapasan sa Akta Republika 8292 kon illegal possession of firearms and explosives.

Samtang sutaon pa usab sa maritime police kun wala bay laing record si Malig-on didto sa ilang lugar kini tungod kay dili pa gyud sila makatumbok kun sakop ba kini’g mga grupo nga kaaway sa gobiyerno. – BANAT NEWS