Tulisan nakaigo na kaniadto dinhi

CEBU, Philippines – Nalambigit na og mga pagpanulis niadto dinhi sa dakbayan ang upat ka mga tulisang nakadagit sa P1.3 milyones nga cash sa mga collector sa GP Dental Supply niadtong Miyerkules sa buntag diha sa may dalan Sanciangko St., ug Leon Kilat barangay Kalubihan.

Kini maoy gibutyag sa hepe sa kapulisan sa dakbayan sa Sugbu Sr. Supt. Patrocinio Comendador subay sa ilang gipahigayong evaluation human sa insidente.

Matud pa ni Comendador nga ang maong grupo duna nay records sa mga pagpanulis dinhi sa Sugbu ug dunay mga local contacts sa ilang mga operasyon.

Apan iyang giklaro nga ang maong grupo sa mga tulisan ang ni-adopt og laing mga taktika sa ilang targets sa pagpanulis kini pinaagi sa pagamit na karon og mga motorsiklo.

Hinuon ang anggulo sa inside job dili pa gyud nila masalikway sa ilang imbestigasyon, samtang dili usab ikalimod nga posibleng dunay pipila ka tawo o mga nasilo nga kawani sa GP dental Supply.

Wala pa usab sila’y identity sa mga tulisan tungod kay naglisod sa paghulagway ang mga testigos sa panagway sa mga suspetsado hinungdan nga wala usab sila karo’y cartographic sketch niini.

Gibutyag niini nga ang maong establisamento usa sa ilang gipahimangnoan niadtong mga nanglabay’ng semana nga usa sa target nga tulison basi usab sa ilang nakuhang intelligence report ug nasibo usab ang ilang impormasyon. – BANAT NEWS