Pag-decriminalized sa bagransya hugtanong gisupak sa Hunta

CEBU, Philippines – Supak si Provincial Board member Juan Bolo ug Peter John Calderon sa balaudnon nga gipanday ni Senador Francisco “Chiz” Escudero nga nag-decriminalized sa bagransiya ug pagsuroy-suroy sa tungang gabii.

Sumala pa ni bokal Bolo, ang chairman sa committee on education sa Hunta Probinsiyal nga dako kaayo og epekto sa komunidad ang pagwagtang sa balaod nga nagsilot niadtong mga tawo nga naglatagaw sa kagabhion.

Nabalaka si Bolo nga posibleng modaghan ang kriminalidad mugna sa mga batan-ong nalambigit sa illegal nga drugas, miyembro sa mga gang ug fraternities ingon man nalambigit sa tulis, labni, kawat ug uban pang krimen. Gitataw ni Bolo nga mas maayo pang hugtan ang pagpatuman niini ug patas-an pa ang multa aron motagam ang mga tawong nakalapas niini.

Samtang si bokal Calderon nagkanayon nga ang maong balaudnon naghatag lamang og kalibog sa kapolisan tungod dili na man kini makabadlong sa mga tawong maglatagaw sa kagabhion nga posibleng mabiktima sa krimen o ba kaha mopasiugda og krimen. - Chester Abadilla (BANAT NEWS)