Nasunogan sa M'daue gitabangan sa Kapitolyo

CEBU, Philippines – Nagpadala na og mga hinabang pagkaon ang kagamhanan sa probinsya sa Sugbu ngadto sa gatusan ka pamilyang apektado sa sunog sa sitio Mangga ug Lemoncito sa barangay Umapad dakbayan sa Mandaue.

Ang hepe sa Provincial Social Welfare and Development Office (PSWDO) nga si Marivic Garces mipahibawo niini sa ilang paghatag og 50 ka sakong bugas humay, laing tag 25 ka karton sa noodles ug delata.

Matud ni Garces nga pasiuna lang kining ayuda sa Kapitolyo ug dugang pang ayuda ang ihatag sa mosunod nga mga adlaw sa higayun nga makaduso na unya ang Social Welfare sa dakbayan sa Mandaue sa kinatibuk-ang lista sa tanang pamilya nga apektado sa sunog niadtong Lunes.

Gibana-banang 280 ka panimalay ang naugdaw sa sunog nga nirehistro og kwatro siyentos ka pamilya ang naigo sa maong kalamidad apan padayun pa nihimo og pakisusi ang mga Social Workers sa maong siyudad.

Sa iyang bahin gipaningkamotan karun ni Bokal Wenceslao Gakit sa ikaunom nga distrito nga mahatagan og mga housing materials ang gatusan ka mga pamilya nga apektado sa maong kalamidad.

Nunot niini, gipangayo ni Gakit ang listahan sa tanang mga nasunogan gikan sa Mandaue City Disaster aron mao kini ang iyang basihan pagpangayo sa Kapitolyo alang sa gahin pagpamalit og housing materials. - Rey Pasaporte (BANAT NEWS)