Nerez sa PRO-7 ok ra ni Tom

CEBU, Philippines – Pabor si Mayor Tomas Osmeña nga si Chief Supt. Lani-o Nerez ang mangulo sa Police Regional Office (PRO-7) kun mobiya na sa katungdanan si Chief Supt. Federico Terte nga moretiro karong Sabado.

Gawas kang Nerez, laing kandidato pagka-direktor sa PRO-7 mao sila si Chief Supt. Ireneo Bacolod ug Chief Supt. Josefino Cataluña.

Si Bacolod girekomendar ni Osmeña kaniadto, apan ang gipaboran sa Camp Crame mao si Chief Supt. Ronald Roderos nga girekomendar ni Gobernador Gwendolyn Garcia.

Kahinumduman, si Nerez nahimo nang direktor sa Cebu City Police Office apan gipalagpot sa puwesto tungod sa sunodsunod nga pagpanulis samtang ang mayor didto sa gawas sa nasud nagpatambal. - Elly Bolonos (BANAT NEWS)