Kawatan napatay sa sikyu

CEBU, Philippines – Napusilan patay sa guwardiya ang usa sa duha ka mga gitumbok nga notadong kawatan ug magsulod gawas lang sa bilanggoan human misukol ug nakigpinusilay sa dihang nasakpan nga nangawat sulod sa compound sa shipyard didto sa Sitio Tawagan, barangay Tayud lungsod sa Consolacion niadtong Martes sa alas 7:10 sa buntag.

Ang   kawatan nga napusilan patay mao si Violito Soco Ibale alyas Ingkit, 42, ulitawo ug molupyo sa Sitio Tawagan, barangay Tayud sa maong lungsod samtang ang naka-eskapo nga kauban niini naila lang sa pangalan nga si Danilo Mabasa.

Samtang ang   gwardiya nga nakapusil patay mao si Larry Tomarong, sakop sa LRD security force services nga nadestino sa Santiago Shipyard nga gipanag-iya sa usa ka Harold Tan.

Matud ni SPO1 Ricardo Ermac, imbestigador sa Consolacion Police Station sa dihang nahinabi sa Banat News   nasakpan sa gwardiya si Ibale ug Mabasa nga nagtinabangay pagkuha sa lima ka B.I. steel pipe gikan sa compound ug ilang gihakot sakay sa pumpboat.

Sa dihang nabantayan   sa guwardiya nga paingon nang mosibat dala ang mga kinawat nga butang, gipasalbahan dayun niya kini aron mohunong apan mibalos pagpamusil ang usa   kanila hinungdan nga napugos ang gwardiya pagpusil niini gamit ang shotgun ug maayong pagkaigo ni Ibale sa ulo ug natagak sa dagat ug ang kauban niini nakahigayon pagsibat pahilayo.

Matud ni SPO1 Ermac mga alas 2:30 na sa hapon nadiskubrehan ang patay’ng lawas sa biktima ilawom sa dagat sa dihang gisawom kini sa mga divers sa maong lugar. - Darrel Carumba (BANAT NEWS)