CEBU, Philippines – Lisud nga mahitabo ang hangyo ni Mayor Rogelio Baquerfo sa lungsod sa Tudela nga pahulipan ang di mominos napulo ka mga sakop sa kapulisan sa ilang lungsod.
Kini maoy gipadayag ni Supt. Erson Digal ang officer-in-charge (OIC) sa Cebu Provincial Police Office dihang nahinabi sa mga sakop sa media human si Mayor Baquerfo gikahinabi sa usa ka radio station dinhi sa Sugbu labot niini.
Matud pa ni Digal nga lisod ang maong hangyo tungod kay dili kini madali-dali pagpangita og ikailis ug gikinahanglang dunay request nga magdetalye gyud sa rason matag usa ka polis nga buot nilang pahulipan.
Gawas nga kulang sila og mga sakop duna say mga mayor nga di manawat og polis nga gipalagpot gikan sa ubang lungsod.
Nasayran nga una nang gimando ni Digal sa kapulisan sa Tudela nga dili gyud mag-apil-apil sa isyu sa politika human si Mayor Baquerfo maoy giila sa Comelec nga mananaog sa 2007 election batok kang Demetrio Granada, apan bisan paman niini pabilin gihapon sa ilang mga pwesto ang mga gipanguhang trabahante ni Granada diha sa munisipyo. - Guam Logroño (BANAT NEWS)