CEBU, Philippines – Si Kongresista Benhur Salimbangon sa ika-upat nga distrito sa lalawigan wala pa hingpit nga mokompirmar sa plano sa iyang igsuon nga si Mariquetta Salimbangon Yeung sa lungsod sa Bogo.
Nasayran si Mariquetta nagparehistro sa miaging pipila ka semana diha sa Bogo hinungdan adunay mitumaw nga mga pagduda nga modagan kini pagka mayor sa umaabot 2010 election diha sa maong lungsod kontra sa banay’ng Martinez.
Apan ang kongresista sa pakighinabi niini sa Banat News miingon nga ang pagparehistro sa iyang igsuon diha sa Bogo wala magpasabot nga modagan kini sa pagka mayor sa Bogo sa eleksiyon sunod tuig.
Giklaro niya nga natural lang nga magparehistro si Mariquetta sa Bogo sanglit aduna kini pinuy-anan ug ingon man negosyo sa maong lungsod.
Mitataw ang kongresista nga sa pagkakaron wala pa sila maghisgot sa iyang igsuon kabahin sa politika kun dili ang una nilang giatiman mao ang pagtabang sa mga panginahanglanon sa katawhan sa tibuok kwatro distrito.
Gikataw-an lang sa kongresista ang migawas nga pagduda tungod kay walay plano ang iyang igsuon apan kun mahitabo man gyud kini andam niyang suportahan ang iyang igsuon kun unsa may makab-ot niining desisyon.
Nasayran usab nga daghan na kaayong mga kabus ang nahatagan og hinabang ni Mariquetta Salimbangon Yeung ilabi na niadtong mga bata nga bungi ang na-operahan dili lang diha sa ika-upat nga distrito kun dili lakip na kadtong mga bata nga bungi nga gikan sa lain-laing mga lugar dinhi sa Visayas region ang na-operahan nga libre sa foundation sa banay'ng Salimbangon. - Rey B. Pasaporte (BANAT NEWS)