CEBU, Philippines – Ang Police Center for Aviation and Security (PCAS-7) mohimo og lawom nga imbestigasyon sa pagkaangkon og samad pinusilan ni Chief Inspector George Ylanan sa Criminal Investigation and Intelligence Bureau (CIIB) atubangan sa domestic departure area sa Mactan Cebu International Airport sa miaging kaadlawon.
Si Supt. Joselito Solido, hepe sa PCAS-7 nagkanayon nga gawas sa pamahayag sa asawa ni Ylanan, tun-an usab nila ang ubang mga ebidensiya sama sa surveillance camera sa palibot sa airport.
Sa pagkakaron, sumala pa ni Supt. Solido, ang pamahayag lamang sa asawa ni Ylanan ang ilang gibasehan. Kini nagkanayon nga samtang naghatod siya sa bana nga opisyal, aksidenteng mibuto ang service firearm niini nga kalibre .9mm nga pistola.
Gihimakak ni Supt. Solido nga adunay nahitabo komosyon tali sa magtiayon atol sa hitabo.
Sa rekord sa surveillance camera nga nahipos sa Airport Police Force, nakita sa kapolisan ang pag-abot sa sakyanan ni Ylanan nga wala magdugay adunay migawas nga babaye. Sa sunod nga eksina, adunay taksi nga mitupad sa sakyanan sa opisyal ug si Ylanan mibalhin sa taksi ug dali nga mipahilayo.
Sumala pa ni Supt. Solido nga sa maong katapusang eksina, si Ylanan gidala diay sa tambalanan human kini makaangkon og samad pinusilan sa iyang tiyan.
Ang mga imbestigador sa PCAS-7 naka-recover og slug sa kalibre .9mm, samtang wala na makit-i ang service pistol ni Ylanan.
Ang kaso giduso sa PCAS-7 ngadto sa Lapulapu City Police Office (LCPO). Apan si Sr. Supt. Mariano Natuel, officer in charge sa LCPO, nagdumili sa pagkomentaryo sa insidente samtang wala pa niya mahinabi si Ylanan kinsa anaa pa karon sa intensive care unit (ICU) sa Chong Hua Hospital.
Sa susamang kalambuan, si acting Mayor Michael Rama mipahimangno kang Sr. Supt. Patrocinio Comendador nga ipaubos pag-usab sa gun safety seminar ang mga sakop niini aron dili na masubli ang nahitabo ni Ylanan.
Mipasalig si Rama nga ang kagamhanan sa dakbayan sa Sugbo motabang sa pagpa-ospital kang Ylanan. - Bong Soriano ug Elly Bolonos (BANAT NEWS)