Inihaw'ng mga manok gisakmit

CEBU, Philippines – Nakasakmit na usab og inihaw'ng mga manok ang Operation Hot Meat sa Department of Veterinary Medicine and Fisheries (DVMF) sa Cebu City Hall kagahapong adlawa.

Matud pa sa labaw sa DVMF nga si Dr. Alice Utlang nga moabot sa 364 ka inihaw'ng manok gikan sa siyudad sa Talisay ang gisakmit sa iyang mga sakop.

Ang nahisgutang mga dressed chicken nga giingong itumod unta diha sa merkado sa Carbon apan naabtan sa Operation Hot Meat diha sa barangay Basak, Pardo.

Nagkanayon si Utlang nga ang nagtumod sa inihaw'ng mga manok napakyas pagpakita og meat inspection certificate hinungdan nga kini gisakmit.

Giangkon ni Utlang nga ang tag-iya sa gisakiyo nga mga karneng manok nga si Gerry Oberes usa ka lehitimong supplier og mga karneng manok sa siyudad.

Apan midugang ang labaw sa DVMF nga nakadawat usab siya og taho nga ang maong negosyante mopaihaw usab og mga manok diha ra sa ila.

Positibo ang nadawat nga taho sa labaw sa DVMF human masuta nga walay meat inspection certificate ang gitumod niini kagahapon.

Lakip sa gipasakmit ni Utlang mao ang sakyanan nga gikargahan sa mga manok tungod kay kini giingong wala marehistro sa iyang buhatan o sa National Meat Inspection Service.

Ang gisakiyong dressed chicken giplanuhan ni Utlang nga ipakaon sa binuhing tigre ug buaya sa Cebu City Zoo ug ang uban idonar ngadto sa Parian Drop-In Center. - Elly Bolonos (BANAT NEWS)