BIR, BOC employees patas-a'g suweldo

CEBU, Philippines – Si Kongresista Eduardo Gullas sa unang distrito sa lalawigan nagplanong mausbawan pa ang suholan sa mga empleyado sa Bureau of Internal Revenue (BIR) ug Bureau of Customs (BOC) apan sa usa ka kundisyon, kinahanglang mapasaka nila ang tax collection ngadto sa P15 porsiyento matag tuig.

Sa iyang House Bill 6240, ang Kongresista nagkanayon nga ang BIR ug BOC nga empleyado hataga’g kahigayonan nga mausbawan ang suholan basta modako ang ilang tax collection.

“The bill allows BIR and the BOC officials and employees to qualify for salary adjustments provided their annual increase in actual tax and customs duties collection is not less 15%,” matud ni Gullas.

Matud pa niya ang adjustments sa personnel services ug salary magdepende sa kantidad sa koleksyon gikan sa nangaging katuigan.

Sa maong paagi nagtuo si Gullas nga mapalambo pa ang kapabilidad sa Bureau of Internal Revenue (BIR) ug Bureau of Customs (BOC).

“It is the policy of the State to reform revenue administration and ensure efficient and effective of taxes and duties to meet the government’s financial requirements,” dugang pa niya.

Gawas pa niini, ang compensation package sa duha ka ahensya gi-aprobahan sa Department of Finance apan ang ilang annual collection sa duha ka ahensya maoy himuong basehanan sa adjustment sa maong compensation package.

Ang maong bill ni Gullas nagkinahanglan usab og pagtukod sa National Revenue Academy (NRA) nga maoy tahasan sa pagpahigayon og trainings, education programs ug uban pang kurso alang sa mga opisyal ug empleyado sa duha ka buhatan.

Kun maaprobahan ang maong balaudnon, ang mga opisyales ug personnel sa duha ka buhatan gimanduan na nga mopaubos og training ug seminar, samtang ang mga aplikante kinahanglang makaduso og basic courses sa dili pa sila dawaton. - Rey Pasaporte (BANAT NEWS)