Pangulo sa PRO-7 mobiya na

CEBU, Philippines – Gihugun-hugunang mobalik sa Sugbu ang kanhi director sa Cebu City Police Office nga si Chief Supt. Lani-O Nerez isip mosunod nga Police Regional Office (PRO-7) director tungod sa pagretiro na karong Sabado ni Chief Supt. Federico Terte.

Giingong dunay tulo ka mga pangalang kandidato sa pagka PRO-7 director nga giduso sa Campo Crame ngadto sa buhatan ni Gobernador Gwendolyn Garcia aron kapilian.

Kini mao sila si Chief Supt. Lani O’ Nerez, Chief Supt. Ireneo Bacolod nga lumad nga taga Daanbantayan,Cebu ug Chief Supt. Josefino Catalonia.

Si Terte nga nahinabi sa mga tigbalita kagahapong adlawa nagpasalamat nang daan sa mga lokal nga opisyal dinhi sa Sugbu ug rehiyon gumikan kay bisan paman sa tulo niya ka bulang paghupot sa maong posisyon daghan siya’g nahimong kalampusan.

Lakip sa iyang gipasalamatan si Gobernador Garcia ang tsirman sa Regional Disaster Coordinating Council ug Regional Peace and Order Council (RPOC) gumikan sa walay puas nga suporta sa katumanan sa mga programa sa PRO-7.

Gani atol sa iyang paglingkod isip PRO-7 daghan siyang napasulbad nga kaso ingon gipatangtang nga mga police, napasakaan sa kasong administratiba gumikan sa ilang mga kasaypanan.

Gani mapasalamaton usab siya sa tanang mga chief of police sa tanang probinsya sa rehiyon siete ug tanang mga police nga miabag sa mga proyekto ug kampanya batok krimen. Gihulagway niini nga ang pinaka-memorable niyang pagserbisyo sa PNP mao ang iyang pag-apil sa 1987 revolution uban sa mga rebelding sundalo gani nabalhog pa siyag 3 ka tuig una pa nakabalik sa serbisyo.

Subay niini nagpasalamat usab siya sa mga sakop sa media dinhi sa Sugbu kini tungod kay lahi kini kun ikumparar sa ubang mga media dinhi sa nasud. Dugang pa niini nga ning iyang pagretiro ang iyang pamilya maoy labing malipay gumikan kay iya na kining ikauban sa tibuok adlaw. - Guam Logroño ug Rey Pasaporte (BANAT NEWS)