Hepe sa IDMB sa CCPO naunay sa armas

CEBU, Philippines – Si Chief Inspector George Ylanan, hepe sa Investigation and Detection Management Branch (IDMB) sa Cebu City Police Office (CCPO) nalandig sa Chong Hua Hospital human aksidente niyang napusilan ang iyang tiyan sa kaugalingong service firearm kagahapon sa kaadlawon sa Mactan-Cebu International Airport.

Si Sr. Supt. Mariano Natuel, hepe sa Lapulapu City Police Office nga nahinabi sa DySS Super Radio nagkanayon nga diha sa departure area si Chief Insp. Ylanan ug adunay gihatud dihang nahitabo ang aksidente.

Matud pa niini nga gipahibalo nalang siya sa iyang mga sakop nga gidala nila si Ylanan sa Mactan Doctors Hospital ug gibalhin na sa Chong Hua Hospital dinhi sa dakbayan sa Sugbu. Bisan kun nasamdan sa ibabaw’ng bahin sa pusod makaestorya pa gihapon si Ylanan. Giingong wala makalapos ang bala sa .45 kalibreng pistola niini.

Nagdumili hinuon paghatag og dugang detalye si Natuel labot sa maong insedente gawas lang sa pagklarong aksidente ra gyud ang nahitabo.

Si Sr. Supt. Patrocinio Comendador nga nahinabi sa mga sakop sa media kagahapon nagkanayon nga tua pa sulod sa operating room si Ylanan apan giingong stable ang kahimtang niini sanglit samtang paingon kini sa operating room nakig-estorya pa kini kaniya sa cellphone.

Sumala pa niini base sa impormasyong nadawat, si Ylanan uban sa iyang asawa adunay gihatud sa tugpahanan dihang nahitabo ang aksidente.

Subay niini ang Cebu City Police Office makig-alayon karon sa Lapulapu Police Office alang na sa pagpalawom pa sa imbestigasyon labot sa nahitabo.

Si Sr. Supt. Natuel ang personal nga nibisita sa buhatan ni Comendador kagahapon sa hapon alang sa maong imbestigasyon pagsuta kun unsang pagka-unsaa nga naunay si Ylanan sa iyang armas. Kagahapon sa buntag si Chief Supt. Federico Terte ang pangulo sa Police Regional Office (PRO-7) mimandong palawman ang imbestigasyon aron mawala usab ang mga pagduda unya sa publiko.

Si Terte mipahimangno ngadto sa tanang mga personnel sa kapulisan nga mag-amping sa paghupot sa ilang mga armas aron malikayan ang susamang aksidente. Matud pa niya maayo nalang nga walay laing tawo ug sibilyan nga naigo. Samtang sugod kagahapong adlawa si Supt. Jonathan Abella nga hepe sa City Intelligence Branch (CI) maoy gitudlo ni Comendador isip OIC sa IDMB samtang si Ylanan magpaalim pa sa tambalanan. – BANAT NEWS