...sa Danao 10 ka balay naugdaw

CEBU, Philippines – Mokabat sa P1.2 milyones   ang kinatibuk-ang danyos sa pagkasunog sa siyam ngadto sa 10 ka mga boarding houses sa sitio Canlingo barangay Sabang siyudad sa Danao niadtong Domingo sa alas 2:40 sa hapon.

Matud pa ni SFO3 Darwin Almacin, fire investigator sa Danao Fire Station dihang nahinabi sa Banat News nadawat nila ang alarma sa sunog alas 2:40 sa hapon.

Giingong nagsugod sa kwarto sa panimalay nga gipanag-iya sa usa ka Liza Brigoli nga giabangan sa usa ka Redin Paalisbo ang maong kalayo, giisa kini ngadto sa 3rd alarm. Lakip sa miabag pagpawong sa kalayo mao ang kabomberohan gikan sa lungsod sa Carmen, Compostela, Lilo-an ug mga fire volunteers.

Sa imbestigasyon ni Almacin hingpit nga nasunog ang mga boarding houses nila ni Brigoli, Rebecca Dosdos, Ellen Ruta, Elizabeth Commendador, Tito Omega, Arnold Mendoza, Alejandra Escuadra, Angelina Dellard ug Efren Teves nga pulos gipa-abangan sa mga trabahante sa Mitsumi.

Apan matud pa ni SFO3 Almacin, ang kapitan sa barangay nga si kapitan Dario Almadin mitawag kaniya kagahapon ug mipahibawo nga moabot gyud og 10 ang tanang nasunog nga panimalay.

Wala pa matumbok ang hinungdan sa sunog nga naggikan sa pinuy-anan ni Brigoli gawas lang sa impormasyong dunay nakit-ang bagang aso diha sa maong balay. - Darrel Carumba (BANAT NEWS)